Toncoin (TON) kriptovalyutasi o'z nomini Gram (GRAM) deb o'zgartirgani ma'lum qilindi. Ushbu o'zgarishlar va loyihaning kelib chiqish tarixi bo'yicha ma'lumotlar e'lon qilindi. Gram โ€” The Open Network (TON) deb nomlangan markazlashmagan 1-darajali blokcheyn tarmog'ining asosiy raqamli valyutasidir. Ushbu tarmoq ochiq kodli bo'lib, uning faoliyatini Shveytsariyada joylashgan notijorat tashkilot โ€“ TON fondi va boshqa ko'plab tarmoq ishtirokchilari qo'llab-quvvatlab keladi. Loyiha tarixi 2017-yilda Telegram jamoasi Telegram Open Network deb nomlangan blokcheyn tarmog'i va uning Gram deb ataluvchi kriptovalyutasini ishlab chiqishni boshlagan davrdan boshlanadi. Biroq, 2020-yil may oyida Telegram asoschisi Pavel Durov AQSH Qimmatli qog'ozlar va birjalar komissiyasi (SEC) sudi qaroridan so'ng kompaniya ushbu loyihadan chiqishini e'lon qilgandi. Shuning uchun asl Gram tokeni o'sha paytda chiqarilmagan edi. 2020-yildan beri texnologiya mustaqil dasturchilar va blokcheyn ishqibozlari hamjamiyati tomonidan rivojlantirib kelinmoqda. Shulardan eng mashhuri TON fondi hisoblanadi. Vaqt o'tishi bilan "Telegram Open Network" nomi "The Open Network" deb o'zgartirildi, uning kriptovalyutasi esa avval Toncoin, so'ngra Gram deb nomlandi. Tarmoq oq qog'ozi (whitepaper) Telegram asoschilaridan biri Nikolay Durov tomonidan yozilgan kod qismlarini o'z ichiga oladi. Tarmoq o'zining masshtabliligi va barqarorligini ta'minlash uchun Proof-of-Stake (PoS) konsensus modelidan foydalanadi. TON fondining asosiy maqsadi 2028-yilga borib 500 million foydalanuvchiga o'zining raqamli shaxsi, ma'lumotlari va aktivlariga egalik qilish imkoniyatini berishdir. Bunga Telegram messenjerida Web3 ekotizimini yaratish orqali erishish ko'zda tutilgan. The Open Network asoschilari sifatida Anatoliy Makosov va Kirill Emelianenko ko'rsatilgan. Tarmoqning o'ziga xos xususiyatlaridan biri uning shardlash tamoyiliga asoslangan ko'p darajali tuzilishidir. Tarmoqni "blokcheyn ichidagi blokcheyn" deb tasavvur qilish mumkin, chunki u bir nechta kichik tarmoqlardan foydalanadi. Ushbu shardlash texnologiyasi tarmoqqa tranzaksiyalarni tez va samarali bajarish, cheksizga yaqin parallel amallarni amalga oshirish imkonini beradi. Tez va arzon tranzaksiyalarni ta'minlash qobiliyati Telegram ushbu tarmoqni o'zining rasmiy Web3 infratuzilmasi sifatida tanlashining asosiy sabablaridan biridir.