macOS kodida Apple kompaniyasi oʻziga tegishli ikkita oʻyin geympadini sinovdan oʻtkazgani aniqlandi. T6502 va T1057 indeksli bu qurilmalar dastlab tizim profiliga kiritilgan boʻlsa-da, keyingi yigʻmada ularni olib tashlashdi. Har ikki gadjet Made for iPhone toifasiga kiradi va asosiy tugmalar jamlanmasiga ega. Birinchi T6502 modeli faqat USB orqali ulanib, harakat datchiklari va qoʻshimcha imkoniyatlarga ega emas, lekin alohida taktil tebranish tizimi bilan ajralib turadi. Ikkinchi T1057 versiyasi esa USB hamda Bluetooth orqali ishlaydi, giroskop, akselerometr hamda yaxshilangan tebranish mexanizmini oʻz ichiga oladi. Ularning kodlari topilganiga qaramay, bu qurilmalar seriyali ishlab chiqarilishiga yoki shunchaki ichki sinov prototiplari boʻlganiga aniqlik yoʻq.