Shimoliy Koreya mudofaa vaziri Kan Sun Nam Koreya yarimorolida yadro urushi boshlanishi muqarrar ekaniga qatʼiy ishonch bildirdi. Ushbu bayonot yuqori martabali mulozimning XI Moskva xalqaro xavfsizlik konferensiyasidagi chiqishi chogʻida eʼlon qilindi. KXDR mudofaa idorasi rahbarining soʻzlariga koʻra, yarimoroldagi yadroviy qarama-qarshilik ehtimoli endilikda "agar sodir boʻlsa" degan mavhum bosqichdan oʻtib, "qachon" va "kim tomonidan sodir etilishi" kabi amaliy savolga aylangan. Kan Sun Nam AQSh hamda uning Janubiy Koreyadagi ittifoqchilarining tajovuzkorona siyosati Shimoli-Sharqiy Osiyo mintaqasidagi vaziyatni izdan chiqarishga sabob boʻlayotganini alohida qayd etdi. Eslatib oʻtamiz, avgust oyining boshlarida KXDR yetakchisi Kim Chen In Koreya Mehnat partiyasi Markaziy harbiy komissiyasining yigʻilishida nutq soʻzlagan edi. Oʻshanda u hududdagi murakkab harbiy-siyosiy vaziyatni hisobga olib, mamlakat qurolli kuchlarining hujumkorlikka tayyorgarligini yanada kuchaytirish zarurligini aytgandi. Shuningdek, u harbiy-sanoat majmuasini zamonaviy talablarga moslashtirish muhimligiga eʼtibor qaratgandi. Hozirgi vaqtda Koreya yarimorolidagi vaziyat oʻta tarangligicha qolmoqda. Mudofaa vazirining soʻnggi bayonotlari esa yuzaga kelishi mumkin boʻlgan yadroviy mojaro xavfi naqadar jiddiy va real ekanini yaqqol koʻrsatib turibdi.