NBA doirasidagi mashhur Kawhi Leonard va “Los-Angeles Clippers” klubi atrofidagi mojaro hali toʻliq yakuniga yetmaganga oʻxshaydi. Bir yillik tekshiruvlardan soʻng liganing oʻz qarorini chiqargani va qattiq jazo choralari koʻrilganiga qaramabay, mavzu boʻyicha yangi tafsilotlar yuzaga chiqishi mumkinligi aytilmoqda. Bu haqda dastlabki fosh etish ishlari ortida turgan taniqli jurnalist Pablo Torre maʼlum qildi. Eslatib oʻtamiz, NBA oʻtkazgan uzoq yillik tekshiruv natijasiga koʻra, “Clippers” jamoasi draftning birinchi raundidagi beshta huquqidan mahrum qilingan edi. Shuningdek, klub egasi Steve Ballmerga 30 million dollar miqdorida jarima solinib, rahbariyatdagi bir nechta shaxslar lavozimidan chetlatildi. Basketbolchi Kawhi Leonardning oʻziga esa 700 ming dollar jarima belgilandi. Liga bu qarorlar yakuniy ekanini taʼkidlagan boʻlsa-da, ommaviy axborot vositalaridagi bu mojaro hali davom etishga oʻxshaydi. Jurnalist Pablo Torrening soʻzlariga koʻra, uning ixtiyorida NBA rasmiy hisobotiga kirmagan muhim maʼlumotlar mavjud. Oʻz koʻrsatuvida bu haqda ochiq aytgan jurnalist qoʻlida yanada koʻproq dalillar borligini va ularning barchasini yoritishga ulgurish-ulgurmasligini ham bilmasligini taʼkidladi. Hozircha bu yangi tafsilotlarning mazmuni sir saqlanmoqda, bu esa jamoatchilikdan maʼlum bir ehtiyotkorlikni talab qiladi. Avvalroq Pablo Torrening olib borgan surishtiruvlari “Clippers” klubining “Aspiration” kompaniyasi bilan aloqalari hamda Leonardga uning asosiy maoshidan tashqari berilgan shubhali tijorat shartnomalariga qaratilgan edi. Shuningdek, jurnalist yangi “Intuit Dome” arenasidagi ulkan ekran qurilishida qatnashgan “Daktronics” kompaniyasi bilan tuzilgan kelishuvlarni ham fosh etgandi. Unga koʻra, Leonard maydondan tashqarida koʻp millionli homiylik shartnomalaridan manfaatdor boʻlgan. Torre eʼlon qilishi kutilayotgan yangi materiallar NBA tomonidan tayinlangan amaldagi jazolar va qarorlarni oʻzgartira olmasa-da, klub atrofidagi ushbu shov-shuvli ishga butunlay boshqa oʻlcham olib kirishi mumkin. Mutaxassislar vaziyatning rivojini diqqat bilan kuzatib borishmoqda.