Samarqand viloyatining Oqdaryo tumanida ayanchli jinoyat sodir etildi. Erkak oilaviy kelishmovchilik ortidan o'z turmush o'rtog'i hamda besh oylik farzandining hayotiga zomin bo'ldi va oxirida o'z joniga qasd qildi. Ushbu fojiali holat jamoatchilikka ma'lum qilindi. Voqea ortidan tuman tibbiyot birlashmasi tomonidan tegishli idoralarga xabar berilgan. Shundan so'ng voqea joyiga yetib kelgan tergov-tezkor guruhi tomonidan xonadon ko'zdan kechirilib, marhumlarning jasadlari va zarur dalillar rasmiylashtirib olingan. Tekshiruvlar davomida xonadon egasining turmush o'rtog'i tanasida jarohatlar borligi aniqlangan. Dastlabki ma'lumotlar va guvohlar bergan ko'rsatmalarga ko'ra, oilaviy mojaro fojianing sababi bo'lgan. Erkak janjal paytida o'z rafiqasiga qaychi yordamida jarohat yetkazgan va beshikdagi go'dakni bo'g'ib o'ldirgan. Shundan so'ng u o'zini hovlidagi og'ilxona shiftiga osib qo'ygan. Hodisa joyidan qon izlari bo'lgan ashyolar, jumladan qizg'ish yelim dastali qaychi, arqon hamda boshqa zarur namunalar ashyoviy dalil sifatida olingan. Mazkur holat yuzasidan tuman prokuraturasi tomonidan Jinoyat kodeksining tegishli moddasi bilan jinoyat ishi ochilib, tergov harakatlari boshlangan.