"Liverpul" hujumchisi Muhammad Saloh klub bilan tuzilishi kutilayotgan yangi bitim bo'yicha o'z talablarini ma'lum qildi. Unga ko'ra, misrlik futbolchi yangi shartnomaga asosan haftasiga 300-380 ming funt sterling miqdorida maosh olishni istamoqda. The Independent nashri tarqatgan ma'lumotlarga tayansak, 29 yoshli hujumchi mazkur talablar orqali Angliya Premyer-ligasining eng yaxshi futbolchilaridan biri maqomini yana bir bor tasdiqlash niyatida. Avvalroq, o'tgan yozda mersisaydliklar o'z safidagi bir qator yetakchi o'yinchilar bilan hamkorlik shartnomalarini uzaytirgani ma'lum qilingan edi. Biroq, jamoaning asosiy yulduzlaridan biri bo'lib turgan Muhammad Saloh hozircha klub bilan yangi bitim imzolagani yo'q. Hozirgi vaqtda tomonlar o'rtasidagi vaziyat borgan sari keskinlashib bormoqda. Buning asosiy sabablaridan biri sifatida futbolchining "Liverpul" bilan amaldagi shartnomasi 2023-yilda yakuniga yetishi ko'rsatilmoqda.