💻 BIOS янilash nima uchun muhim?

Intel va AMD protsessorlarida aniqlangan jiddiy nosozliklar foydalanuvchilarga BIOS yangilanishlarini e'tiborsiz qoldirib bo'lmasligini eslatdi. O'n uchinchi va o'n to'rtinchi avlod Intel chiplarida yuzaga kelgan muammo noto'g'ri kuchlanish sozlamalari va ona platalar taqdim etgan agressiv quvvat rejimlari bilan bog'liq bo'lib chiqdi. Natijada protsessorlar ortiqcha kuchlanish olib, beqaror ishlagan va silikonning qaytarib bo'lmaydigan darajada buzilishiga duch kelgan. Ushbu zaiflikni bartaraf etish uchun Intel to'rtta shoshilinch mikrokod yangilash dasturini taqdim etishga majbur bo'ldi.

Asosiy muammo shundaki, unumdorlikni oshirish maqsadida ona platalar juda yuqori kuchlanish bergan, protsessorlar esa harorat yuz darajaga yetguncha chastotani tushirmagan. Bu holat shikastlangan chip barqaror ishlashi uchun ko'proq bazaviy kuchlanish talab qiladigan Vmin shift hodisasiga olib keldi. Ayrim foydalanuvchilar hatto jismonan kuygan chiplar va shikastlangan soketlar haqida xabar berishgan.

Bunday muammolar faqat Intel bilan cheklanib qolmaydi, balki AMD mahsulotlarida ham kuzatilgan. Xususan, Ryzen 7000 protsessorlari ortiqcha yuqori SoC kuchlanishidan aziyat chekkan. Xavfsiz chegara 1,3 volt bo'lgani holda, bu ko'rsatkich xotiraning EXPO profillari faollashganda 1,4 voltgacha yetishi mumkin bo'lgan. Ushbu nosozlik ba'zi chiplarning, jumladan Ryzen 7 7800X3D modelining qizib ketishi va shishishiga olib kelgan.

Aparat qismidagi xavflardan tashqari, mutaxassislar BlackLotus, LogoFAIL va Sinkclose kabi o'ta xavfli zaifliklarni ham eslatib o'tmoqda. Mazkur tahdidlar zararli kodga UEFI'ga kirib borish va hatto Secure Boot himoyasini chetlab o'tib, operatsion tizim yuklanishidan oldin ham tizim ustidan nazorat o'rnatish imkonini beradi. Barcha tuzatmalar faqat proshivka yangilanishlari ko'rinishida chiqishini hisobga olsak, BIOS'ni o'z vaqtida yangilamaslik xavfli tus olmoqda.