Yandeksdan "Neyroekspert" xizmati 🧠

Yandeks kompaniyasi foydalanuvchilarga turli turdagi fayllar bilan ishlashda yordam beruvchi Neyroekspert nomli yangi xizmatining beta-versiyasini taqdim etdi. Ushbu platforma hujjatlar, taqdimotlar, jadvallar, shuningdek, audio va video yozuvlarni chuqur tahlil qilish imkoniyatiga ega.

Tizimning asosiy vazifasi yuklangan ma'lumotlar asosida maxsus bilimlar bazasini shakllantirishdan iborat. U ma'lumotlarni papkalarga ajratadi va yaratilgan papkalar havolasini istalgan shaxsga ulashish imkonini beradi. Shuningdek, xizmat ma'lumotlarni qiyoslash, ularning mazmunini qisqacha bayon qilish, hisobotlar tayyorlash hamda faqat yuklangan manbalarga tayanib savollarga javob berish funksiyalariga ega.

Saytning umumiy interfeysi loyihalarga bo'lingan bo'lib, hozirgi bosqichda har bir loyihaga 25 tagacha element qo'shish mumkin. Har bir katalog ichida alohida chat-bot faoliyat yuritadi. Dasturchilarning ta'kidlashicha, foydalanuvchilar odatiy chat-botlar kabi muloqot qilib, faqat o'zlari kiritgan manbalar asosida aniq javoblar olishlari mumkin.

Kompaniya vakillarining so'zlariga ko'ra, mazkur xizmat katta hajmdagi ma'lumotlar bilan muntazam shug'ullanadigan mutaxassislar hamda imtihonlarga tayyorgarlik ko'rayotgan talabalar uchun juda qo'l keladi. Sinov muddati yakunlangach, foydalanuvchilar 25 tadan ortiq fayl va havolalarni qo'shish imkoniyatiga ega bo'lishlari rejalashtirilgan.