🏥 Vladimir Kara-Murza shifoxonaga o'tkazildi

Kreml tanqidchisi Vladimir Kara-Murza Rossiyaning Sibir mintaqasidagi qamoqxona shifoxonasiga ko'chirildi va uning advokatlariga ikki kun davomida u bilan uchrashishga ruxsat berilmadi. Bu haqda uning rafiqasi juma kuni ma'lum qilib, dissidentning taqdiridan jiddiy xavotir bildirdi.

Omskdagi IK-6 qattiq tartibli koloniyada 25 yillik qamoq jazosini o'tayotgan 42 yoshli siyosatchi davlatga xiyonat va boshqa moddalar bo'yicha sudlangan. Bu Rossiya rahbarining muxoliflariga nisbatan qo'llanilgan eng og'ir jazolardan biri hisoblanadi. Fevral oyida Arktika qamoqxona koloniyasida Aleksey Navalniy vafot etganidan keyin Kara-Murzaning sog'lig'i borasidagi xavotirlar yanada oshgan edi.

Evgeniya Kara-Murzaning so'zlariga ko'ra, Moskvadan kelgan advokatlar payshanba kuni soatlab kutishganidan so'ng uning boshqa joyga ko'chirilganidan xabar topishgan. Shifoxonaga borgan huquqshunoslarga avvaliga mahbus u yerda yo'qligini aytishgan, keyinchalik esa uning qabul qilingani tasdiqlangan. Biroq juma kuni ham xodimlar uning hujjatlari to'liq rasmiylashtirilmagani va shifokorlar ko'rigida ekanligini vaj qilib, advokatlarni kiritishmagan.

Rossiya xavfsizlik xizmatlari tomonidan avvalroq ikki bor zaharlangani aytilgan Kara-Murza asab kasalligidan aziyat chekadi. 2022 yilning aprelida hibsga olingan va keyinchalik sudlangan muxolifatchi panjara ortidan turib ham Putin siyosatini tanqid qilishda davom etayotgan edi. Hozirda uning advokatlari dam olish kunlaridan keyingina uning holatidan xabar topishga urinib ko'rishlari mumkin.