⚽️ "Inter" "Bernabeu"da 60 yildan beri yutmagan

"Inter" vakili "Real"ga qarshi bo'ladigan o'yin oldidan o'z fikrlari bilan o'rtoqlashib, jamoa oldida klub tarixida yangi va muhim sahifalar ochish majburiyati turganini ta'kidladi. Uning so'zlariga ko'ra, so'nggi yillarda jamoa yuqori standartlarga erishgan va bu muvaffaqiyatni davom ettirish talab etiladi.

Shuningdek, murabbiy Joze Mourinyo uning hayotidagi alohida inson ekanini va og'ir damlarda yordam qo'lini cho'zganini minnatdorchilik bilan esladi. Mutaxassis futbolchilik davrida ham, yoshlar sektorida ishlagan yillarida ham hech kimdan nusxa ko'chirmagani, o'zining shaxsiy futbol g'oyasi shakllanganini qayd etdi. Bu tajribalar unga hozirgi murabbiylik faoliyatida qo'l kelmoqda.

Bo'lajak bahs haqida gapirar ekan, u Madridda o'ynash hech qachon oson bo'lmaganini tan oldi. Ma'lum qilinishicha, "Inter" qo'shni mamlakatdagi bu stadionda naqd 60 yildan buyon zafar qucha olmayapti. Shunga qaramay, jamoa bor imkoniyatini ishga solishga tayyor.

Mutaxassis "Real" bilan o'yinda o'ziga xos uslubdan voz kechmasligini bildirdi. Uchrashuvda maydonda ustunlik qilish va jamoaning o'sganini ko'rsatish asosiy maqsad ekani ta'kidlandi. Shu bilan birga, Madrid klubiga qarshi kurashishning mukammal va yagona usuli mavjud emasligi e'tirof etildi.