🏀 Dereck Lively mavsum boshini o'tkazib yuborishi mumkin

Dallas Mavericks jamoasining markaziy o'yinchisi Dereck Lively II o'ng oyog'ida o'tkazilgan jarrohlik amaliyotidan so'ng hali ham shifokorlardan to'liq ruxsat olgani yo'q. ESPN nashri xabariga ko'ra, basketbolchi mavsumoldi o'quv-mashg'ulot yig'inida qatnasha olmaydi va uning chempionat startidagi ishtiroki ham hali aniqlashtirilmagan.

Biroq, manbalarga ko'ra, 22 yoshli sportchi tez orada basketbol mashg'ulotlariga qaytish uchun harakatlarni jadallashtirmoqda. Jamoa rahbariyati uning tiklanish sur'atidan umidsizlikka tushgani yo'q. Eslatib o'tamiz, Lively doimiy og'riqlar sababli o'tgan yilning dekabr oyida mavsum yakuniga yetishiga sabab bo'lgan operatsiyani boshdan kechirgan edi. Uning shu oyog'ida 2025 yil iyul oyida ham suyak o'simtalarini olib tashlash bo'yicha operatsiya qilingandi.

O'tgan mavsumda u atigi yetti ta o'yinda maydonga tushgan bo'lsa, oxirgi ikki yil davomida jami 43 ta uchrashuvda qatnashdi. O'zining jarohatlarsiz o'tgan yagona mavsumida esa debyutant sifatida 55 ta o'yinda qatnashib, Dallasning 2024 yilgi NBA finaliga chiqishiga katta yordam bergandi. Klub bosh menejeri Mike Schmitz o'tgan oyda Lively tiklanish davrida qattiq mehnat qilayotgani va uning ijobiy kayfiyati hamda yetakchilik fazilatlarini alohida ta'kidlagandi.

Jarohatlar sababli o'yinchining yangi shartnoma bo'yicha muzokaralari murakkablashishi mumkin. Lively oktyabr oyining 19-shanbasigacha yangi kelishuv imzolash huquqiga ega. Agar shu muddatgacha kelishuvga erishilmasa, u kelgusi yozda cheklangan erkin agentga aylanadi. Mavericks jamoasi juma kuni OAV kunini o'tkazib, ertasi kuni yig'inga kirishadi, ilk mavsumoldi o'yini esa 9 oktyabr kuni Makaoda bo'lib o'tadi.