Mbilli va « Canelo » jangi ko'chiriladimi? 🥊

Xalqaro matbuotda tarqalgan xabarlarga ko'ra, professional boqsh yulduzlari Kristian Mbilli hamda Saul « Canelo » Alvares o'rtasidagi kutilgan qarama-qarshilik rejalarida o'zgarishlar yuzaga kelishi mumkin. Dastlabki rejalarga binoan, fransuz bokschisi o'zining WBC chempionlik kamarini meksikalik mashhur raqibga qarshi oktabr oyining oxirida Saudiya Arabistonining Ar-Riyod shahrida himoya qilishi kerak edi.

Biroq so'nggi paytlarda mintaqada kuzatilayotgan xavfsizlik muammolari va siyosiy vaziyat tashkilotchilarni boshqa variantlarni ko'rib chiqishga majbur qilmoqda. Xususan, Ar-Riyod xalqaro aeroporti yaqinidagi yonilg'i omborlariga qilingan hujumlar hamda Qizil dengiz sohilidagi neft inshootlariga qaratilgan xavflar rejalarning o'zgarish ehtimolini oshirmoqda.

Shu sababli, mazkur jahon chempionati jangini boshqa sanaga surib, uni AQShning Las-Vegas shahridagi T Mobile Arenada o'tkazish varianti muhokama qilinmoqda. Ehtimoliy yangi muddat sifatida 21-noyabr sanasi tilga olinmoqda.

Mbilli tomoni hozircha bunday o'zgarishlar bo'yicha rasmiy ko'rsatma olmagan. Shunga qaramay, bokschining murabbiyi vaziyat har soniyada o'zgarib turishi mumkinligini va ular har qanday ssenariyga tayyorgarlik ko'rayotganini tan olgan.

Agar jang haqiqatan ham AQShga ko'chirilsa, bu fransuz sportchisi uchun qo'shimcha qiyinchilik tug'dirishi mumkin. Sababi, Las-Vegasdagi arena to'liq meksikalik muxlislar bilan to'lib, «Canelo» uchun qulay muhit yaratadi. Ar-Riyodda esa muxlislar auditoriyasi neytral bo'lishi kutilayotgan edi.