Toshkent shahrida 2030-yilning yakuniga qadar umumiy uzunligi 118,4 kilometrni tashkil etuvchi 100 ta maxsus sayyohlik, gastronomik va tunda ham faoliyat yuritadigan ko‘chalarni barpo etish rejalashtirildi. Poytaxt rivojiga qaratilgan ushbu yangi chora-tadbirlar va qaror davlat rahbari Shavkat Mirziyoyev tomonidan 27-iyul kuni imzolandi. Mazkur hujjat doirasida shahardagi 35 ta yirik bozor va savdo majmualarini ochiq savdoga chiqarish ham ko‘zda tutilgan. Yangi turistik manzillar poytaxt tumanlari bo‘ylab taqsimlanadi. Xususan, eng ko‘p sayyohlik ko‘chalari Chilonzor tumanida (11 ta) tashkil etiladi. Shuningdek, Mirzo Ulug‘bek, Yunusobod, Sergeli va Yangihayot tumanlarining har birida turg‘unlardan kelib chiqib 10 tadan obyekt paydo bo‘ladi. Olmazor, Mirobod, Shayxontohur, Yakkasaroy hamda Yashnobod tumanlarining har birida 8 tadan ko‘chani obodonlashtirish rejalashtirilgan. Uchtepada 6 ta, Bektemir tumanida esa 3 ta shunday ko‘cha ochilishi belgilangan. Joriy yilning oxirigacha budjetdan mazkur maqsadlar uchun 175 milliard so‘m mablag‘ yo‘naltirilishi ko‘zda tutilgan. Bundan tashqari, shahar markaziy ko‘chalarida va xiyobonlarida 100 ta zamonaviy jamoat hojatxonasi o‘rnatiladi. Ushbu infratuzilma obyektlari uchun yer uchastkalari tadbirkorlarga davlat-xususiy sheriklik tamoyillari asosida ochiq auksionlar orqali beriladi. Poytaxtga olib kiruvchi kirish yo‘llari infratuzilmasida ham o‘zgarishlar amalga oshiriladi. Yo‘l harakati xavfsizligi xizmatining amaldagi postlari Toshkent viloyati hududiga ko‘chiriladi va ularning bo‘shagan o‘rnida 5 ta zamonaviy kemping zonasi barpo etiladi. Ushbu loyihalarni ishlab chiqish ishlari "Tashkent Invest" kompaniyasiga yuklatilgan bo‘lib, kelgusida investorlar ochiq onlayn savdolar orqali tanlab olinadi.