"Izzat Nazarbek" qo'lga olindi! 🚨

Toshkent shahrida o'zini "Izzat Nazarbek" deb tanishtirgan jinoyatchi huquq-tartibot idoralari xodimlari tomonidan qo'lga olindi. Bu haqda poytaxt Ichki ishlar bosh boshqarmasi matbuot xizmati ma'lum qildi.

Huquqni muhofaza qiluvchi organlarga jabrlangan ikki nafar tadbirkor yordam so'rab murojaat qilgan. Ma'lum bo'lishicha, gumonlanuvchi tadbirkorlardan birining hayotiga suiqasd qilish bilan qo'rqitib, 70 ming dollar miqdoridagi mablag'ini o'zlashtirgan. Ushbu summa doirasida u "BMW X5" rusumli avtomobil sotib olishni talab qilgan hamda oshxona jihozlari uchun to'lovni amalga oshirishga majburlagan. Jabrlanuvchi buyurtmani bir kun kechiktirgani uchun ham bosim ostida qolgan.

Ikkinchi tadbirkor esa 2019 yildan beri ushbu shaxs bilan hamkorlik qilib kelgani va doimiy tahdidlar ostida qariyb 38 ming dollar yo'qotganini ma'lum qilgan. Jabrlanuvchining so'zlariga ko'ra, sheriklik davomida talablar oshib borgan va oxir-oqibat o'ldirish bilan qo'rqitishgan. Qayd etilishicha, ikkala tadbirkor ham talonchilik paytida kaltaklanib, jismoniy zo'ravonlikka uchragan.

Shuningdek, militsiyaga shubhali shaxsning qurboniga aylangan yana bir fuqaro – ayol kishi ariza bilan kelgan. Jinoyatchi shaxsiy tusdagi suratlari bilan shantaj qilib, unga nisbatan jismoniy kuch ishlatgan va jinsiy aloqaga majburlagan.

O'tkazilgan tintuv tadbirlari davomida gumonlanuvchining yonidan 2 ta pistolet va o'q-dorilar topib olindi. 1998 yilda tug'ilgan mazkur fuqaroga nisbatan O'zbekiston Respublikasi Jinoyat kodeksining tovlamachilik hamda jinsiy aloqa qilishga majburlash moddalari bo'yicha jinoyat ishi qo'zg'atildi. Ushbu jinoyatlar uchun 15 yilgacha ozodlikdan mahrum qilish jazosi tayinlanishi mumkin.