Kimi Antonelli Italiya GPda zafar quchdi 🇮🇹

Italiya Gran-prisi doirasida kechgan bahsda Kimi Antonelli o‘zining navbatdagi yorqin g‘alabasini qo‘lga kiritdi. O‘z uyida, ko‘plab muxlislar qarshisida harakat qilgan yosh sportchi avtomobil dvigatelidagi jarima sababli startni 19-o‘rindan boshlashga majbur bo‘lgan edi. Biroq bu qiyinchilik uning irodasini sindira olmadi va u murosasiz kurashlar ostida o‘tgan poygada shiddat bilan oldinga intildi.

Musobaqaning 18-davrasiga kelib, Antonelli birinchi burilishda jamoadoshi Jorj Rasseldan o‘zib ketdi va peshqadamga aylandi. Poyga davomida yetakchilar o‘rtasidagi raqobat yanada qizidi. Virtual xavfsizlik mashinasi rejimida Antonelli pit-stopni amalga oshirib, trassaga oltinchi o‘rin bilan qaytdi. Shundan so‘ng u Lyuis Hemilton va Oskar Piastrini ortda qoldirib, marraga yaqinlashdi.

Poyganing hal qiluvchi pallasida, ya'ni marraga 10 ta aylanish qolganda, Rassell shinalari eskiyotganidan shikoyat qildi. Yangiroq shinalarga ega bo‘lgan Antonelli esa imkoniyatdan foydalanib, 4-aylanish qolganda Rasseldan qat'iy ravishda o‘zib ketdi va birinchi o‘rinni egalladi. Rassell ikkinchi bo‘lib marraga yetib keldi, shohsupaning uchinchi pog‘onasidan esa Maks Verstappen joy oldi. Kuchli beshlikni Lando Norris va Oskar Piastri yakunlab berdi.

Ushbu g‘alaba 20 yoshli poygachining chempionlik unvoni sari tashlagan yana bir ulkan qadami bo‘ldi. Hozirda mavsum yakunlanishiga yana 10 ta poyga qolgan bo‘lib, ular orasida Ostin va Las-Vegas shaharlaridagi bosqichlar ham bor. Navbatdagi Ispaniya Gran-prisi esa kelgusi hafta yangi Madring trassasida bo‘lib o‘tadi.