Irlandiyaning Donegal grafligida yashovchi oddiy dehqon Norman Uiterou 2018-yil iyun oyida o‘z yerida ariq qazish ishlarini olib borayotgan vaqtda kutilmagan topilma egasiga aylandi. Tuproqni kovlash jarayonida uning ko‘ziga biror yaltiroq narsa tashlandi va u yerdan to‘rtta oltin halqani topib oldi. U dastlab bu buyumlarni uyiga olib borib, ularni kir va loydan tozalab yuvdi. Oradan bir kun o‘tib, Norman topilgan halqalarni baholash uchun zargarlik do‘koniga ishlaydigan tanishiga olib bordi. Do‘sti bu buyumlar oddiy taqinchoq emas, balki qadimiy ashyolar ekanini aytib, darhol mahalliy ma’muriyatga xabar berishni maslahat berdi. Shundan so‘ng mahalliy hokimiyat organlari muzeyga murojaat qilib, maxsus arxeologlar guruhini tekshiruv uchun yuborishni so‘radi. O‘tkazilgan ekspertiza natijalariga ko‘ra, mazkur halqalar sof oltindan yasalgani aniqlandi. Ularning umumiy og‘irligi naq 4 kilogrammni tashkil etdi. Shuningdek, oltinning tarkibida oz miqdorda kumush va mis aralashmalari ham borligi ma’lum bo‘ldi. Mutaxassislar bu buyumlar bundan 2500 dan 800 yil muqaddam mavjud bo‘lgan bronza davriga yoki undan ham qadimiyroq davrlarga tegishli bo‘lishi mumkinligini taxmin qilishdi. Ushbu qadimiy buyumlar taqinchoq sifatida, turli marosimlarda ishlatiladigan buyum yoki o‘sha davrda to‘lov vositasi vazifasini bajargan bo‘lishi ehtimol tutilgan. Shuningdek, ular Irlandiyada avvalroq topilgan boshqa bronza davri oltin ashyolariga ham o‘xshab ketishi aniqlandi. Donegal grafligi muzeyi mutaxassislari 2018-yilning noyabr oyi oxirida mazkur to‘rtta halqaning narxini 260 ming funt sterling atrofida baholashdi. Shundan so‘ng topilmalar Normanning o‘ziga qaytarib berildi va u faqat madaniy meros ob’ektlarini sotish chog‘ida qo‘shilgan qiymat solig‘ini to‘lashi belgilandi. Shu tariqa, atigi yarim yil ichida oddiy dehqon kutilmagan xazina evaziga boy odamga aylandi.