Bogdan Guskov Ruziboyev mag‘lubiyatiga munosabat bildirdi 🥊

O‘zbekistonlik aralash yakakurash ustasi Nursulton Ruziboyev britaniyalik 39 yashar Maykl "Venom" Peyjga qarshi oktagonda uch raund to‘liq jang qilib, hakamlarning bir ovozdan qabul qilgan qaroriga ko‘ra imkoniyatni boy berib qo‘ydi. Ushbu bahsdan so‘ng UFC'dagi yana bir hamyurtimiz Bogdan Guskov hamyurtimizning mag‘lubiyati yuzasidan o‘z fikrlari bilan o‘rtoqlashdi.

Bogdan Guskovning ta’kidlashicha, Maykl Peyj o‘ziga xos darajaga va noyob uslubga ega bo‘lgan jнгchi hisoblanadi. Uning yoshi o‘z ta’sirini o‘tkazmayotgani, bundan o‘n yil avvalgi dinamikasi saqlanib qolgani, faqatgina ishtiyoqi biroz pasaygani sezilayotganini qayd etdi.

Jangning borishiga to‘xtalarkan, Guskov Nursulton uchun birinchi raund juda yaxshi chiqqanini, biroq keyingi daqiqalarda Peyj o‘z rejasini va jang ssenariysini to‘liq ro‘yobga chiqarganini aytdi. Internet foydalanuvchilari izohlarda yozganidek, bu uchrashuv Ruziboyev uchun og‘ir kechgan.

Shu bilan birga, hamyurtimiz bu kabi murakkab va og‘ir janglar sportchini yanada chiniqtirishi va tajribali qilishini alohida ta’kidlab o‘tdi.