AQShning Minnesota shtatida joylashgan Minneapolis shahri yaqinidagi hududda yuz bergan mudhish yo'l-transport hodisasi natijasida ikki kishi hayotdan ko'z yumdi va yana uch kishi turli darajadagi tan jarohatlarini oldi. Politsiya ma'lumotlariga ko'ra, yakshanba oqshomida noma'lum erkak o'sha yerdagi Park Tavern restoramining avtoturargohiga kirib kelgan, biroq bino ichiga kirmasdan, mashinani to'xtatishga urinib, so'ngra muassasaning ochiq ayvoniga borib urilgan. Kuzatuv kameralari yozib olgan tasvirlarga asoslanib, haydovchi hibsga olingani va unga nisbatan jinoyat ishi ochilib, transport vositasi yordamida qasddan odam o'ldirish aybi qo'yilgani ma'lum qilindi. Biroq huquqni muhofaza qiluvchi organlar hodisaning aniq sabablari hamda gumonlanuvchi va jabrlanganlarning shaxsiga oid ma'lumotlarni hozircha oshkor etishmadi. Mahalliy shifoxonani boshqaruvchi HealthPartners tashkiloti vakilining ma'lum qilishicha, jabrlanganlar safida tibbiyot muassasasi hamshiralari ham bor. Hodisa guvohlaridan biri haydovchi avval uning mashinasining orqa qismiga urilib, so'ngra ochiq ayvonda o'tirgan o'ttizga yaqin kishidan iborat olomon ustiga bostirib borganini bildirgan. Shifokorlardan biri o'sha oqshom hamkasblari bilan birga ushbu restoranda yangi ishga o'tayotgan hamshirani kuzatish marosimini nishonlayotgan bo'lgan. Afsuski, mazkur tantanada qatnashgan o'sha hamshira ham og'ir jarohatlar bilan kasalxonaga yotqizilgan. Bouling yo'lakchalari va o'yin avtomatlari ham mavjud bo'lgan oilaviy dam olish maskani o'z rasmiy bayonotida tergov davom etish munosabati bilan noma'lum muddatga yopilganini e'lon qildi. Ayni paytda Minnesota shtati patrul xizmati voqea joyini o'rganib chiqib, halokat sabablarini aniqlash bo'yicha tergov ishlarini davom ettirmoqda.