"Real" 15 yoshli rekordchi hujumchini kuzatmoqda ⚽️

Madridning "Real" klubi transfer bozorida yana yosh iqtidorlarga e'tibor qaratmoqda. Mundo Deportivo nashrining xabar berishicha, qirollik klubi senegallik yosh hujumchi Amar Diufning xizmatlariga qiziqish bildirmoqda. Ayni paytda 15 yoshli futbolchi "Generasyon Fut" jamoasida o'ynayapti. Biroq oldinroq uning voyaga yetgach, aniqrog'i 18 yoshga to'lgach Fransiyaning "Mets" klubiga o'tishi haqida xabarlar tarqatilgandi.

Amar Diuf xalqaro maydonda o'zining yorqin o'yinlari bilan e'tibor qozonmoqda. O'tgan oyda u Senegal milliy terma jamoasi safida debyut qilib, mamlakat futbol tarixida muhim rekord o'rnatdi. Ruandaga qarshi bahsda (1:1) zaxiradan maydonga tushgan vaqtda uning yoshi 15 yoshu 94 kunni tashkil etgan edi. Ushbu ko'rsatkich orqali u Norvegiya safida 15 yoshu 94 kundan ancha katta yoshda – 15 yoshu 293 kunligida debyut qilgan Martin Edegorning rekordini yangiladi.

Futbolchi shuningdek yoshlar darajasida ham yuqori natijalarni ko'rsatgan. Xususan, u U17 yosh toifasidagi Afrika kubogida raqiblar darvozasiga 5 ta gol kiritib, musobaqaning eng yaxshi to'purari degan nomga sazovor bo'ldi.

E'tiborlisi, yosh hujumchi o'z vaqtida "Liverpul" va "Bavariya" klublaridagi o'yinlari bilan tanilgan taniqli futbolchi Sadio Mane tahsil olgan mashhur akademiyada shug'ullangan.