Esteban Okon 2027-yil uchun erkin agent 🏎

Formula 1 chempionatining taniqli poygachisi Esteban Okon 2027-yilgi mavsumda o'z maqomi bo'yicha muhim bayonot berdi. 30 yoshli fransuz uchuvchisi kelasi yil uchun o'zini to'laqonli erkin agent deb atadi. Uning bu bayonoti Haas jamoasi 2027-yilgi mavsum uchun o'z tarkibini hali aniqlab ulgurmagan bir paytga to'g'ri kelmoqda.

Okon o'z so'zlarida hozirgi vaziyatga izoh berar ekan, uning nazoratidan tashqarida bo'lgan ba'zi jarayonlar muhokama qilinayotganini ta'kidladi. U mavsum oxirigacha bor kuchini ishga solib, vaziyat qanday tus olishini kuzatishini bildirdi. Jamoada qolish ehtimoli haqidagi savolga esa "Ko'ramiz" deya qisqa javob qaytardi.

Ma'lumot uchun, Esteban Okon Formula 1dagi debyutini 2016-yilda Manor jamoasi safida boshlagan edi. U 2025-yilda Haas jamoasiga kelib qo'shilgan, biroq joriy mavsumda jamoadoshi Oliver Berman bilan taqqoslaganda sustroq harakat qilmoqda. Xususan, Berman hisobida 18 ochko mavjud bo'lsa, Okon hozircha atigi 3 ochko to'plagan xolos.

ESPN nashrining xabar berishicha, Haas jamoasi Okonning o'rniga Yuki Tsunodani olib kelishga yaqin turibdi. Shuningdek, kelgusi mavsumda braziliyalik Formula 2 poygachisi Rafael Kamara Oliver Bermanga jamoadosh bo'lishi ehtimoli yuqori baholanmoqda.