Maks Verstappen Le Mans poygasida qatnashmaydi 🏎

Formula 1 bo‘yicha to‘rt karra jahon chempioni Maks Verstappen 2027-yilda mashhur "Le Mansning 24 soat" poygasida qatnashish rejalari yo‘qligini ma'lum qildi. Shunga qaramay, u Nyurburgring va Spa-Frankorkamps trassalarida o‘tkaziladigan 24 soatlik marafonlarda ishtirok etish imkoniyatini ko‘rib chiqmoqda.

Kelasi yilgi Le Mans poygasi 12-13-iyun kunlariga belgilangan bo‘lib, bu muddat Formula 1 chempionatining Monako va Portugaliya bosqichlari orasidagi tanaffus haftasiga to‘g‘ri keladi. Shuningdek, Nyurburgring va Spa musobaqalari ham 2027-yilgi mavsumda F1 taqvimining bo‘sh haftalariga rejalashtirilgan.

Red Bull jamoasi sharafini himoya qilayotgan niderlandiyalik poygachi joriy yildagi Nyurburgringning 24 soatlik poygasida yetakchilik qilib borayotgan vaqtda uzatmalar validagi muammo tufayli musobaqani tark etishga majbur bo‘lgan edi. Uning so‘zlariga ko‘ra, agar jadvali to‘g‘ri kelsa, Spa trassasida ham o‘z debyutini o‘tkazishga qiziqish bildirmoqda.

Boku shahrida o‘tadigan Ozarbayjon Gran-prisi oldidan jurnalistlarga bergan intervyusida Verstappen Nyurburgring va Spa variantlari ehtimoli yuqoriligini, biroq Le Mans hozircha uning rejalariga kirmasini ta'kidladi. U taqvimda to‘qnashuvlar yo‘qligini bilsa-da, bari uning shaxsiy jadvaliga bog‘liqligini qo‘shimcha qildi.

Shu bilan birga, boshqa Formula 1 yulduzlari ham kelajakda shunday chidamlilik poygalarida qatnashish niyati borligini bildirishgan. Jumladan, ikki karra Le Mans g‘olibi Fernando Alonso (Aston Martin) va Lando Norris (Maklaren) shular jumlasidandir. Norrisning fikricha, agar qulay imkoniyat tug‘ilsa, u kelgusida shunday musobaqalarda qatnashishni istaydi, biroq bu yaqin kelajakda sodir bo‘ladimi yoki yo‘q – hozircha noma'lum.