"Сурхон" - "Навбаҳор" баҳсига кириш бепул 🏟

O'zbekiston Superligasining 21-turi doirasida qiziqarli va murosasiz kechishi kutilayotgan "Surxon" hamda Namanganning "Navbahor" klublari o'rtasidagi uchrashuv yaqinlashib kelmoqda. Mazkur bahs futbol ishqibozlarining diqqat markazida bo'lib turibdi.

Klub rahbariyati muxlislarning ko'plab murojaatlari, talab va istaklarini hisobga olgan holda mazkur muhim o'yinga stadionga kirishni mutlaqo bepul etib belgiladi. Bu qaror tribunada jamoani qo'llab-quvvatlash uchun keladigan ishqibozlar sonining oshishiga xizmat qilishi kutilmoqda.

Shuningdek, Asomiddin Hofizov boshchiligidagi ashaddiy va faol muxlislar jamoaga dalda bo'lish hamda stadionda o'zgacha muhit yaratish maqsadida bir nechta muhim tashabbuslarni hayotga tatbiq etishmoqda. Ularning sa'y-harakatlari o'yin oldidan ko'tarinki kayfiyat ulashmoqda.

Musobaqa jadvalidagi vaziyatdan kelib chiqib, "Surxon"ning ushbu uchrashuvdagi g'alabasi jamoaga turnir jadvalida bir necha pog'ona yuqoriga ko'tarilish imkoniyatini taqdim etishi mumkin. Shu bois jamoa bor kuchini ishga solib, ijobiy natija qayd etishga harakat qiladi.

"Surxon" va "Navbahor" jamoalari o'rtasidagi Superliga uchrashuvi 3-oktabr kuni soat 16:00 da start oladi. Barcha futbol muxlislari mazkur qiziqarli qarama-qarshilikka taklif etiladi.