Trent Redden "Klippers"da vaqtinchalik rahbar 🏀

"Los-Anjeles Klippers" basketbol klubida rahbariyat va tarkibda muhim o'zgarishlar amalga oshirildi. Klubning yangi vaqtinchalik boshqaruvchisi Jon Gibson muxlislarga yo'llagan videomurojaatida jamoaning basketbol operatsiyalari bo'yicha prezidenti Lorens Frenk olti oylik diskvalifikatsiyaga uchragani munosabati bilan, uning vazifalarini bajarish vaqtincha bosh menejer Trent Reddenga yuklatilganini e'lon qildi. Ushbu qaror oldindan kutilgan edi, chunki 42 yoshli Redden klub hiyerarxiyasida Frenkdan keyingi ikkinchi asosiy shaxs hisoblangan.

Eslatib o'tamiz, NBA oy boshida Lorens Frenk Kavay Leonardning ruxsat etilmagan homiylik kelishuvlariga aralashgani hamda Leonard va uning oilasi uchun ruxsat etilmagan xarajatlarni tasdiqlagani uchun olti oylik diskvalifikatsiya bilan jazolanganini ma'lum qilgandi. Trent Redden o'z faoliyati davomida 2007-yilda "Klivlend"da skaut sifatida ish boshlagan, keyinchalik o'yinchilar kadrlar bo'limi direktori hamda bosh menejer o'rinbosari lavozimlarigacha ko'tarilgan. 2017-yilda "Klippers"ga kelib qo'shilgan Redden 2023-yilda Maykl Vinger Vashingmonga ketganidan so'ng bosh menejer etib tayinlangan edi.

Frenkning chetlatilishi davrida bosh menejer vazifasini bajarish esa bosh menejer o'rinbosari va katta vitse-prezident Mark Xyuzga yuklatildi. Xyuz bungacha "Nyu-York Niks" jamoasida skaut va kadrlar bo'limi direktori bo'lib ishlagan, shuningdek, 2017-yildan beri "Klippers"da bosh menejer o'rinbosari lavozimida faoliyat yuritib kelmoqda.

Jon Gibson o'zining besh daqiqalik bayonotida bosh murabbiy Tayron Lyuning yetakchiligiga to'liq ishonch bildirishini ta'kidlab, murabbiy qiyin vaziyatlarni yengib o'tish va jamoani birlashtirish qobiliyatiga ega ekanini aytdi. Shuningdek, u o'tgan haftada Toronto klubi bilan Kavay Leonard savdosi yakunlanganini eslatib o'tib, unga minnatdorchilik bildirdi va mavsum oralig'ida jamoaga kelib qo'shilgan Brandon Ingram, Greydi Dik, Rui Xachimura, Maks Strus hamda Kiton Vagler kabi o'yinchilardan umid qilishini bildirdi. Gibsonning so'zlariga ko'ra, klub g'alaba qozonish madaniyatini ta'minlash maqsadida basketbol va biznes operatsiyalarini har tomonlama ko'rib chiqmoqda.