VAR qarorlari bo‘lmaganda nima bo‘lardi? ⚽

Ispaniya chempionatining 25-turi doirasida «Barselona» klubi safarda Bilbao shahridagi «Atletik» mehmoni bo‘lib qaytdi. Mazkur bahsda kataloniyaliklar minimal 1:0 hisobidagi g‘alabani qo‘lga kiritishdi. O‘yinning so‘nggi daqiqalarida mezbonlar hujumchisi Inyaki Uilyams darvoza to‘riga to‘p kiritgan bo‘lsa-da, hakamlar bu golni hisobga olishmadi. Vaziyatni VAR orqali tekshirgach, hujum boshlanishida Iker Muniain to‘pga qo‘l bilan tekkani ma’lum bo‘ldi va gol bekor qilindi.

Ushbu g‘alabadan keyin «Barselona» 65 ochko bilan La Liga turnir jadvalida peshqadamlikni davom ettirmoqda. Ularning asosiy ta’qibchisi bo‘lgan «Real»Hisobida esa hozircha 56 ochko mavjud. Shunga qaramay, hakamlar va video takrorlar tizimi qarorlari chempionatdagi vaziyatga qanday ta’sir qilayotgani haqida qiziqarli tahlillar paydo bo‘lmoqda.

Taniqli tahlilchi Pedro Martin taqdim etgan ma’lumotlarga ko‘ra, joriy mavsum davomida VAR aralashuvi tufayli «Barselona» qo‘shimcha 4 ochko jamg‘arishga muvaffaq bo‘lgan. Shu bilan birga, asosiy raqib «Real Madrid» jamoasi aynan shu tizim qarorlari sababli 5 ochko yo‘qotgan. Agar Ispaniya chempionatida umuman VAR tizimi qo‘llanilmaganida edi, bugungi kunga kelib har ikki yetakchi jamoaning ochkolari bir xil ko‘rinish olib, 61 tadan bo‘lgan bo‘lar edi.

Eslatib o‘tamiz, muxlislar intizorlik bilan kutayotgan navbatdagi "El-Klasiko" bahsi 19 mart kuni 26-tur doirasida "Kamp Nou" stadionida bo‘lib o‘tadi. Ushbu uchrashuv chempionlik poygasidagi asosiy taqdirni hal qiluvchi o‘yinlardan biri bo‘lishi kutilmoqda.