Italiyalik mutaxassislar O‘zbekiston termasida 🇮🇹

Fabio Kannavaro boshqaruvidagi O‘zbekiston milliy terma jamoasi murabbiylar shtabi yana ikki nafar tajribali italiyalik mutaxassis bilan boyidi. Bu haqda O‘zbekiston futbol assotsiatsiyasi rasman ma’lum qildi.

Jamoaga fizioterapevt lavozimiga Silvano Kotti taklif etildi. Boy xalqaro tajribaga ega bo‘lgan ushbu mutaxassis o‘z faoliyati davomida Italiya hamda Xitoy milliy terma jamoalarida, shuningdek, "Inter", "Milan", "Chelsi" va "Roma" kabi Yevropaning nufuzli top-klublarida faoliyat yuritgan.

Shuningdek, biolog-nutritsiolog va sport nutriyasi bo‘yicha mutaxassis Andrea Iuliano ham O‘zbekiston terma jamoasi shtabidan o‘rin oldi. U ilgari Italiyaning "Udineze" klubida hamda Shveysariyaning U-21 yoshlar terma jamoasida sport nutritsiologi yo‘nalishida faoliyat olib borgan.

O‘FA xabariga ko‘ra, mazkur yangi mutaxassislar milliy jamoaning tayyorgarlik jarayonlarida o‘yinchilarning jismoniy holatiga, mashg‘ulotlar hamda o‘yinlardan keyin to‘g‘ri tiklanishiga hamda sport ovqatlanishini tashkil etishga bevosita mas’ul etib belgilandi.

Ma’lumot uchun, O‘zbekiston milliy terma jamoasi 21-sentyabrdan boshlab navbatdagi o‘quv-mashg‘ulot yig‘iniga kirishdi. "Oq bo‘rilar" ushbu tayyorgarlik doirasida uchta o‘rtoqlik o‘yinida maydonga tushishi rejalashtirilgan bo‘lib, 24-sentyabrda Eron, 1-oktyabrda Suriya va 6-oktyabrda Janubiy Koreya termalariga qarshi bahs olib boradi.