Qashqadaryoda o‘quvchining ota-onasiga chora ko‘rildi 🏫

Qashqadaryo viloyatining Qarshi shahridagi 1-ixtisoslashtirilgan umumiy o‘rta ta’lim maktabida jamoatchilik e’tiborini tortgan noxush holat yuz berdi. Ta’lim muassasasining yuqori sinf o‘quvchilaridan biri maktabda belgilangan ichki tartib hamda odob-axloq qoidalarini qo‘pol ravishda buzib, sinfxonada suv solingan chelakka hojat chiqargan.

Mazkur voqea aks etgan videotasvir internet tarmog‘ida tarqalib ketgach, holatga rasmiy munosabat bildirildi. Ma’lum bo‘lishicha, o‘quvchining bu qilig‘ini uning sinfdoshi videoga olib, ijtimoiy tarmoqlarga tarqatgan.

Holat yuzasidan Qarshi shahar ichki ishlar organlari faoliyatini muvofiqlashtirish boshqarmasi tomonidan surishtiruv ishlari olib borildi. Voyaga yetmagan bolaning ota-onasiga nisbatan Ma’muriy javobgarlik to‘g‘risidagi kodeksning 47-moddasi 1-qismida ko‘rsatilgan huquqbuzarlik alomatlari mavjudligi sababli ma’muriy bayonnoma tuzildi.

To‘plangan hujjatlar o‘rganib chiqish uchun voyaga yetmaganlar ishlari bo‘yicha Qarshi shahar idoralararo komissiyasiga taqdim etildi. Komissiya qaroriga ko‘ra, o‘quvchining ota-onasi mazkur modda bo‘yicha aybli deb topilib, ularga nisbatan ma’muriy jazo chorasi qo‘llanildi.

Tarqalgan xabarlarga ko‘ra, tartibbuzarlik sodir etgan o‘quvchining otasi Qashqadaryo viloyati prokuraturasida mas’ul lavozimda ishlaydi. Viloyat Xalq ta’limi boshqarmasi axborot xizmati rahbari Javohir Rustamov bu ma’lumotni tasdiqlagan, biroq prokuraturada ishlayotgan otaning qancha miqdorda jarimaga tortilganidan bexabarligini ma’lum qilgan.

Amaldagi Ma’muriy javobgarlik to‘g‘risidagi kodeksning 47-moddasiga binoan, ota-onalar yoki ularning o‘rnini bosuvchi shaxslar tomonidan bolalarni tarbiyalash va ta’lim berish majburiyatlarini bajarmaslik bazaviy hisoblash miqdorining 1 baravaridan 5 baravarigacha miqdorda jarima solinishiga sabab bo‘ladi.