Maks Verstappen F1'ni tark etishni o‘ylagan 🏎

To‘rt karra Formula 1 jahon chempioni Maks Verstappen o‘tgan oyda Red Bull jamoasi bilan shartnomasini 2030-yilgacha uzaytirishdan oldin poygani butunlay tark etish yoki boshqa jamoaga o‘tish haqida jiddiy o‘ylaganini ma'lum qildi. Bu haqda nufuzli sportchi Germaniyaning Bild nashriga bergan intervyusida batafsil to‘xtalib o‘tdi.

Bild nashriga bergan intervyusida 28 yoshli niderlandiyalik poygachi boshqa jamoalar bilan bo‘lgan muzokaralarga har doim jiddiy yondashish kerakligini, biroq oxir-oqibat u boshqa jamoaga o‘tishdan ko‘ra Formula 1'ni tark etishga ancha yaqin turganini tan oldi. Uning so‘zlariga ko‘ra, bu 50 ga 50 qaror bo‘lib, u karyerasini yakunlash haqida jiddiy o‘ylab ko‘rgan, biroq avtomobil poygalariga bo‘lgan cheksiz muhabbati uni sportda ushlab qolgan.

2021–2024-yillar oralig‘ida ketma-ket to‘rt bor chempionlikni qo‘lga kiritgan Verstappen joriy mavsumda hali birorta ham g‘alaba qozongani yo‘q. Yakshanba kuni Madridda bo‘lib o‘tgan Ispaniya Gran-prisida ikkinchi o‘rinni egallagan poygachi hozirda chempionat jadvalida 6-poygachini band etib turibdi va Mercedes vakili Kimi Antonellidan 147 ochko ortda qolmoqda. Shunga qaramay, u yangi shartnomani tashqi bosim ostida imzolamaganini ta'kidladi.

Verstappen o‘zini Formula 1'da boshqa hech narsani isbotlashga hojati yo‘q deb hisoblaydi. Uning fikricha, ilk chempionlikdan keyanoq u o‘z oldiga qo‘ygan barcha maqsadlariga erishgan va tarix kitoblari uchun emas, balki shaxsan o‘zi, jamoasi hamda muxlislari uchun poyga qilmoqda. Shuningdek, u 45 yoshli Fernando Alonso kabi 40 yoshgacha poygachi bo‘lib qolishni rejalashtirmayotganini, faqatgina jarayondan zavq olguncha ishlashini qo‘shimcha qildi. Formula 1 taqvimi ikki haftadan so‘ng Ozarbayjon Gran-prisi bilan davom ettiriladi.