Dok Rivers murabbiy sifatidagi faoliyatiga yakun yasadi 🏀

2025/26 yilgi mavsum yakunida "Baks" klubidan ketgan tajribali mutaxassis Dok Rivers murabbiylik faoliyatini yakunlaganini rasman tasdiqladi. Bil Simmonsning podkastida bu haqda gapirgan murabbiy, dushanba kuni NBC Sports telekanali uni kelgusi NBA mavsumi uchun o'yin tahlilchisi sifatida e'lon qilganidan keyin o'z so'zlarini yana bir bor tasdiqladi. Associated Press muxbiri Jo Ridiga bergan intervyusida u endi mutlaqo nafaqaga chiqqanini va televizorga yuz foiz e'tibor qaratishga tayyorligini bildirdi.

O'yinchi sifatidagi faoliyatini 1996 yilda yakunlagan Rivers o'sha paytda murabbiylikka bo'lgan qiziqishi sababli NBC taklifini rad etgan edi. Garchi u ilgari Turner Sports va ESPN telekanallarida qisqa muddat faoliyat yuritgan bo'lsa-da, oxirgi o'n yilliklar davomida asosan NBA bosh murabbiyi sifatida ishladi. 1999–2026 yillar oralig'ida "Medjik", "Seltiks", "Klippers", "Siksers" hamda "Baks" jamoalarini boshqargan 64 yoshli mutaxassis muntazam chempionatlarda 1194 ta g'alaba va 866 ta mag'lubiyat qayd etgan. Shuningdek, uning hisobida pley-of o'yinlaridagi 114 g'alaba va 2008 yilda "Boston" bilan qo'lga kiritilgan chempionlik unvoni mavjud.

Rivers NBA tarixidagi eng ko'p g'alaba qozongan murabbiylar ro'yxatida muntazam mavsumlar bo'yicha oltinchi, pley-of bahslari bo'yicha esa to'rtinchi o'rinni egallab turibdi. NBC telekanalining matbuot xabarida qayd etilishicha, u o'z vaqtida hozirda telekanalda ekspert sifatida ishlayotgan besh nafar sobiq basketbolchini, jumladan o'g'li Ostin Rivers, Grant Hill, Treysi MakGredi, Brayan Skalabrini va Jamal Kroufordlarni boshqargan.

Dok Ridi bilan suhbatda o'g'li Ostin bilan birga ishlash juda qiziqarli bo'lishini va telekanal jamoasining qariyb yarmi bilan allaqachon tanish ekanligini ta'kidladi. Eslatib o'tamiz, NBC va Peacock telekanallari 2026/27 yilgi mavsumda 100 ta muntazam mavsum o'yinlarini namoyish etadi va translyatsiyalar 20 oktyabr kuni ochilish oqshomi bilan boshlanadi.