Erondagi o‘zbekistonlik futbolchilar xavfsizlik uchun mamlakatni tark etmoqda ⚽️

AQSH va Isroil tomonidan Eron hududiga amalga oshirilgan havo zarbalari ortidan mazkur mamlakatda faoliyat yuritayotgan o‘zbekistonlik futbolchilar xavfsizlik nuqtayi nazaridan Eronni vaqtincha tark etishga majbur bo‘lmoqda. Ushbu xabarni O‘zbekiston futbol assotsiatsiyasidagi manba ham tasdiqladi.

Ma’lum bo‘lishicha, Eron chempionatida to‘p surayotgan O‘zbekiston milliy terma jamoasining bir qator a’zolari mamlakatdagi keskin va notinch vaziyat sababli xavfsiz hududlarga yo‘l olgan. Jumladan, "Istiqlol" klubi sharafini himoya qilayotgan Rustam Ashurmatov ayni paytda Dubay shahrida bo‘lib turibdi. Shuningdek, uning jamoadoshi Jaloliddin Masharipov jarohatidan to‘liq tiklanish jarayonini o‘tash uchun Italiyaga yo‘l olgani ma’lum qilindi.

"Traktorsozi" jamoasi a’zosi Odil Hamrobekov esa Toshkentga sog‘-salomat qaytishga ulgurgan. "Persepolis" klubi futbolchilari Igor Sergeyev hamda Oston O‘runov ham Eronni tark etish harakatida bo‘lib, xabarlarga ko‘ra, Sergeyev 28-fevral kuni chegara tomon yo‘lga chiqqan bo‘lsa, O‘runov Turkiya davlatiga o‘tish choralarini ko‘rmoqda.

Eslatib o‘tamiz, 28-fevral kuni mahalliy vaqt bilan soat 09:30 atrofida Tehron shahri bilan bir qatorda Isfahon, Qum, Kerej va Kirmonshoh kabi yirik hududlar raketa hujumiga uchragan edi. Hozirgi vaqtda Eron havo hududi har qanday fuqarolik parvozlari uchun butunlay yopib qo‘yilgan.

Qizil yarim oy jamiyatining so‘nggi rasmiy ma’lumotlariga ko‘ra, mazkur harbiy hujumlar oqibatida mamlakatdagi 24 ta viloyatda jami 201 nafar kishi halok bo‘lgan. Shuningdek, 747 kishi turli darajada tan jarohati olgan. Xususan, Eron janubidagi Minob shahrida joylashgan qizlar maktabiga berilgan zarba oqibatida 150 nafarga yaqin inson qurbon bo‘lgani xabar qilinmoqda.