📊 50 trln so'mdan ortiq investitsiya o'zlashtirildi

2022-yilning dastlabki uch oyi davomida O'zbekistonda asosiy kapitalga kiritilgan investitsiyalar hajmi sezilarli darajada o'sdi. Xususan, ushbu davrda mamlakat bo'yicha jami 50,1 trillion so'mlik investitsiyalar o'zlashtirildi. Mazkur ko'rsatkich 2021-yilning mos davri bilan solishtirilganda 26,6 foizga ko'p ekanligi qayd etildi. Shuningdek, investitsiyalarning yalpi ichki mahsulotdagi ulushi 30,8 foizni tashkil etdi.

Hisobot davrida asosiy kapitalga yo'naltirilgan investitsiyalarning asosiy qismi to'g'ridan-to'g'ri va boshqa xorijiy investitsiyalar hamda davlat kafolatlanmagan kreditlar (43,2 foiz), shuningdek, korxonalar va aholining o'z mablag'lari (38,3 foiz) hisobidan moliyalashtirildi.

Moliyalashtirish manbalaridagi o'zgarishlarga ko'ra, davlat tomonidan kafolatlangan xorijiy kreditlar hajmi 38,4 foizga qisqargan. Biroq, to'g'ridan-to'g'ri va boshqa xorijiy investitsiyalar hamda kafolatsiz kreditlar hajmining 56,5 foizga o'sishi evaziga tashqi resurslarning umumiy investitsiyadagi ulushi 46,2 foizga yetdi.

Ichki davlat resurslari hisobidan moliyalashtirish hajmining kamayishiga Tiklanish va taraqqiyot jamg'armasidan ajratilgan mablag'larning 74,9 foizga qisqarishi sabab bo'ldi. Shu bilan birga, aholi mablag'lari hisobidan moliyalashtirish 3,4 foizga kamayganiga qaramamay, korxonalar o'z mablag'lari va tijorat banklari kreditlari o'sishi hisobiga ichki xususiy resurslar asosiy moliyalashtirish manbasi sifatidagi o'rnini saqlab qoldi.