BMT eksperti O'zbekistonning repatriatsiya ishlarini olqishladi 🇺🇿

BMTning terrorizmga qarshi kurashishda inson huquqlarini rag'batlantirish va himoya qilish masalalari bo'yicha maxsus ma'ruzachisi Fionnuala Ni Aolayn O'zbekistonga amalga oshirgan o'n kunlik safari yakunlari bo'yicha o'z xulosalarini e'lon qildi. U o'z bayonotida O'zbekiston hukumatining mojaroli hududlardan, xususan Suriya, Iroq va Afg'onistondan ayollar hamda bolalarni qaytarish va reintegratsiya qilish bo'yicha amalga oshirgan ishlarini yuqori baholadi.

Xususan, 2019-yil may oyidan beri faoliyat yuritib kelayotgan "Mehr" operatsiyasi xalqaro miqyosda oila birligi va jamoatchilik ko'magiga asoslangan ilg'or tajriba namunasi sifatida e'tirof etildi. Mutaxassisning ta'kidlashicha, mazkur yondashuv bolalarning manfaatlarini va qaytib kelgan xotin-qizlarning jamiyatga mazmunli qo'shilishini ta'minlashda muhim o'rin tutadi.

Shu bilan birga, BMT vakili O'zbekistondagi ekstremizm va terrorizmga qarshi kurashish hamda jinoiy qonunchilikning ayrim qoidalarini tanqidiy ko'rib chiqish zarurligini bildirdi. U Jinoyat kodeksining ba'zi moddalari juda keng va mavhum ekanini qayd etib, ularni xalqaro huquq normalari va inson huquqlari standartlariga muvofiqlashtirish bo'yicha sezilarli islohotlar o'tkazishni tavsiya qildi.

Tashrif davomida so'z erkinligi, yig'ilishlar o'tkazish, adolatli sudlov, qiynoqlardan xoli bo'lish hamda e'tiqod erkinligini ta'minlash masalalari ham diqqat markazida bo'ldi. Maxsus ma'ruzachi hukumatning UNICEF va boshqa xalqaro tuzilmalar bilan hamkorligini yuqori baholab, kelgusida jarayonlarni doimiy monitoring qilish va baholab borish muhimligini eslatdi.