Tolibon AQSHga qator talablar qo‘ydi 🇦🇫

Afg‘onistonda yangi hukumatni tuzgan Tolibon harakati vakillari Qatarda AQSH delegatsiyasi bilan uchrashuv o‘tkazdi. Bu voqea toliblar mamlakatda hokimiyat tepasiga kelib, muvaqqat hukumatni shakllantirganidan buyon tashqi dunyo bilan o‘tkazilgan ilk rasmiy muloqot va yangi hukumat a’zolarining ilk xorijiy safari bo‘ldi.

Shanba kuni Afg‘oniston muvaqqat hukumatining tashqi ishlar vaziri Amir Xon Mottaki ushbu muzokaralar haqida ma’lumot berdi. Uning so‘zlariga ko‘ra, uchrashuv davomida Kobul va Vashington o‘rtasidagi munosabatlarda yangi sahifa ochish imkoniyatlari ko‘rib chiqilgan. Tomonlar Afg‘onistonga gumanitar yordam ko‘rsatish hamda imzolangan Doha tinchlik bitimiga rioya qilish masalalarini muhokama qilishgan.

Muzokaralar jarayonida afg‘on delegatsiyasi AQSH tomoniga bir qator talablarni qo‘ydi. Xususan, Vashingtondan Afg‘oniston havo chegaralarini buzmaslik, mamlakatning ichki ishlariga aralashmaslik hamda xorijiy davlatlardagi aktivlarni muzlatishni to‘xtatish talab qilingan.

Muzokaralar shungacha davom etib, shanba kuni kechqurun yakunlanishi va yakshanba kuni yana qayta tiklanishi rejalashtirilgan edi. Ikki tomonlama muloqot chog‘ida faqat siyosiy va xavfsizlik masalalari emas, balki tibbiy yordam masalalari ham ko‘tarildi.

Jumladan, AQSH delegatsiyasi muzokaralar natijasida Afg‘oniston aholisi uchun koronavirusga qarshi kurashish maqsadida vaksinalar yetkazib berishni va’da qildi. Bu muzokaralar ikki tomonlama munosabatlarning kelgusi yo‘nalishini belgilab olishda muhim qadam bo‘ldi.