O‘zbekiston milliy jamoasi bugun Malayziyaga qarshi 🇲🇾

O‘zbekiston milliy jamoasi FIFA kunlari doirasida Iordaniya poytaxti Ammanda o‘quv-mashg‘ulot yig‘inini tashkil etgan bo‘lib, bugun Malayziya termasiga qarshi navbatdagi o‘rtoqlik uchrashuvini o‘tkazadi. Srechko Katanets bosh murabbiyligidagi ikkinchi o‘yinda mutaxassis tarkibdagi yangi o‘yinchilarni sinovdan o‘tkazishi rejalashtirilgan.

Srechko Katanets ushbu yig‘inga jami 24 nafar futbolchini jalb etdi. Tarkibdagi o‘zgarishlarga ko‘ra, Eldor Shomurodov Toshkentga emas, to‘g‘ridan-to‘g‘ri Iordaniya poytaxtiga yetib keldi. Jasur Yaxshiboyev esa jarohati bois yig‘inda qatnasha olmaydigan bo‘ldi va uning o‘rniga «Lokomotiv» yarimhimoyachisi Azizbek Amonov milliy jamoaga chaqiruv oldi. Avvalgi yig‘inlardan farqli o‘laroq, bu safar hujum chizig‘i yaxshi sport formasidagi forvardlar bilan to‘ldirilgani mutaxassislarni quvontirmoqda.

O‘zbekiston jamoasining bu safargi raqiblari sifatida aynan Malayziya va Iordaniya tanlangani muxlislarda savollar tug‘dirgani tabiiy. Bosh murabbiy Srechko Katanetsning tushuntirishicha, bu jamoalar O‘FAga kelib tushgan takliflar ichidan tanlab olingan va ularni tanlashda boshqa maxsus sabab bo‘lmagan. Hozirgi vaqtda o‘rtoqlik o‘yinlari uchun raqib topish qiyinligi hamda bunday rejalar kamida yarim yil yoki bir yil oldin tuzilishi lozimligi ta'kidlandi. Sloveniyalik mutaxassis O‘zbekistonda ish boshlaganiga ko‘p bo‘lmagani sababli raqib tanlash imkoniyati bo‘lmaganini, shu bois bor variantlardan Malayziya va Iordaniya tanlanganini ma'lum qildi. Rejaga ko‘ra, ikkita o‘rtoqlik o‘yinida imkon qadar barcha futbolchilarga yetarlicha o‘yin amaliyoti beriladi.

Statistikaga nazar tashlaydigan bo‘lsak, FIFA reytingida 86-pog‘onani egallab turgan O‘zbekiston milliy jamoasi reytingda 153-o‘rinda borayotgan Malayziyaga qarshi shu paytga qadar o‘tkazilgan 6 ta uchrashuvning barchasida g‘alaba qozongan. Shu boisdan ham bu raqib milliy jamoamiz uchun eng qulay va oson raqiblardan biri sifatida e'tirof etiladi. Mazkur jamoalar ustidan qo‘lga kiritilgan eng yirik g‘alabalar qatoriga 1994 yilda Rustam Akromov boshchiligida Osiyo o‘yinlarida hamda 2007 yilgi Osiyo kubogida qayd etilgan natijalar kiradi.