🇹🇷 Yoshlar bayramda Anıtkabir'ni ziyorat qildi

19 mayıs – Atatürkni xotirlash, yoshlar va sport bayrami munosabati bilan Anıtkabir majmuasida rasmiy tadbir tashkil etildi. Yoshlar va sport vaziri Kasapoğlu boshchiligidagi delegatsiya tarkibidan Turkiyaning 81 viloyatidan, shuningdek Shimoliy Kipr Turk Respublikasi va Ozarbayjondan tashrif buyurgan yoshlar, sportchilar, vazirlik xodimlari hamda sport federatsiyalari vakillari oʻrin oldi.

Turk bayroqlarini koʻtarib kelgan yoshlar bilan birgalikda Aslonli yoʻldan yurib oʻtgan vazir Kasapoğlu Otaturk maqbarasiga kelib toʻxtadi. Hurmat bajo keltirilib, Davlat madhiyasi yangragach, maqbaraga maxsus gulchambar qoʻyildi. Shundan soʻng Misak-ı Milli minorasiga oʻtgan Kasapoğlu Anıtkabir maxsus daftariga oʻz tilaklarini yozib qoldirdi.

Vazir daftar yozuvida 104 yil muqaddam Samsunga qadam qoʻyilishi Vatanimiz uchun burilish nuqtasi boʻlganini taʼkidladi. Shuningdek, bugungi kunda Turkiya Asri eshigida turgan mamlakatning eng katta kuchi va kafolati yoshlar ekanini qayd etdi. Vazirlik yoshlarning har sohada rivojlanishi va yuqori muvaffaqiyatlarga erishishi uchun barcha imkoniyatlarni safarbar etayotganini bildirdi.

Tadbirdan keyin OAV vakillariga bayonot bergan Kasapoğlu Samsunda yoqilgan istiqlol mashʼalasining 104 yilligini ayni ruh va ishonch bilan nishonlayotganlarini aytdi. Kelajak avlod barcha jabhalarda kuchli asrni barpo etishini taʼkidlab, yoshlar nafaqat mamlakatimiz, balki butun insoniyatning umidi ekanligini qoʻshimcha qildi.