Paxtakor tarixiy natijaga erishdi 🏆

«Paxtakor» futbol klubi O‘zbekiston chempionatlari tarixida o‘ziga raqib bo‘lgan barcha jamoalar ustidan g‘alaba qozongan yagona jamoa sifatida qayd etildi. Klub matbuot xizmatining xabar berishicha, bu natija «sherlar»ning milliy birinchilikdagi mutlaq ustunligini ko‘rsatib beradi.

Toshkentliklar chempionat doirasida o‘zi to‘qnash kelgan jami 38 ta jamoaning barchasini mag‘lubiyatga uchratishga erishdi. Bu boradagi so‘nggi muhim qadam 20-tur doirasida Yaypaning «Turon» jamoasiga qarshi kechgan o‘yinda qo‘yildi.

Ma'lum bo‘lishicha, yaypanliklar O‘zbekiston chempionatida poytaxtliklarga raqib bo‘lgan 38-jamoa edi. Ushbu jamoalar o‘rtasidagi birinchi davra uchrashuvida durang natija qayd etilgan edi.

Biroq shanba kuni «Paxtakor» o‘z stadionida mazkur raqibni taslim etib, o‘ziga xos tarixiy natijani rasmiylashtirdi. Klub ta'kidlashicha, chempionatlardagi o‘zaro qarama-qarshiliklarda birorta ham raqibga qarshi salbiy ko‘rsatkichga ega bo‘lmagan yagona jamoa aynan «Paxtakor» hisoblanadi.