Liverpulda jiddiy yo'qotish ⚽

«Liverpul» klubi Angliya Premyer-ligasining navbatdagi 7-turi doirasida bo‘lib o‘tadigan «Manchester Siti»ga qarshi o‘yin oldidan muhim yo‘qotishga uchrashi mumkin. Jamoa bosh murabbiyi Yurgen Klopp himoyachi Trent Aleksandr-Arnoldning ushbu markaziy uchrashuvdagi ishtiroki so‘roq ostida ekanini ma’lum qildi.

Kloppning so‘zlariga ko‘ra, 22 yoshli futbolchi mashg‘ulotlar jarayonida mushaklari bilan bog‘liq muammoga duch kelgan va jarohat olgan. Shu sababli u 28 sentyabr kuni Chempionlar ligasining 2-turi doirasida «Portu»ga qarshi kechgan va 5:1 hisobida yakunlangan o‘yinda maydonga tusha olmagandi.

Murabbiy dastlab jarohat unchalik jiddiy ko‘rinmaganini, biroq futbolchi tibbiy ko‘rikdan o‘tgach, muammo kutilganidan jiddiyroq ekani ma’lum bo‘lganini tan oldi. Shu boisdan murabbiylar shtabi uni «Manchester Siti»ga qarshi bahsda maydonga tushirish masalasida xavotirda.

Ma’lumot uchun, «Liverpul» hamda «Manchester Siti» o‘rtasidagi prinsipial uchrashuv joriy yilning 3 oktyabr kuni bo‘lib o‘tishi belgilangan. Mazkur o‘yin Toshkent vaqti bilan soat 20:30 da boshlanishi rejalashtirilgan.