Ikromjon Aliboyev: Shatskix boshqacha futbol talab qilyapti ⚽

O'zbekiston Superligasining 14-tur doirasida tashkil etilgan "Paxtakor" va "Dinamo" jamoalari o'rtasidagi bahs mezbonlarning 3:2 hisobidagi g'alabasi bilan yakunlandi. Ushbu murosasiz uchrashuvdan so'ng "sherlar" a'zosi Ikromjon Aliboyev OAV vakillarining savollariga javob qaytardi va jamoadagi o'zgarishlar haqida gapirib o'tdi.

Uchrashuv qiyin kechganini ta'kidlagan yarim himoyachi yangi bosh murabbiy qo'l ostida ilk rasmiy o'yin o'tkazilganini eslatdi. Raqibning 12 yil deganda Toshkentda 2 ta gol urganiga munosabat bildirarkan, bu shunchaki futbol ekani va har bir jamoa gol urishga intilishini aytdi.

Jamoa safida dubl qayd etgan tajribali hujumchi Marat Bikmayevning harakatlariga to'xtalib, uni hali hisobdan chiqarib yuborishga erta ekanini, hujumchi o'zini yana ko'rsatishga qodir ekanini alohida ta'kidladi.

Murabbiylar shtabidagi o'zgarishlarga to'xtalarkan, Slavche Voyneskining uslubi jamoaga tushmagani yoki boshqa jihatlar haqida gapirishni istamasligini, biroq Maksim Shatskixning g'oyalari jamoa geniga ancha yaqinroq ekanini bildirdi. U o'rtoqlik o'yinlari va tayyorgarlik jarayonlari yaxshi taassurot qoldirgani, ikkinchi davrada yanada yaxshiroq o'yin namoyish etishlarini aytdi.

Chempionlik poygasidagi raqobat haqida gapirar ekan, ochkolar bo'yicha "So'g'diyona" ular bilan teng kelayotganini, shuningdek "Navbahor" va "Nasaf" jamoalari ham borligini, lekin barcha klublarda imkoniyatlar teng ekanini va chempionlik kurashi oxirgi turgacha davom etishini taxmin qildi. Shuningdek, futbolchi Sharqiy Osiyodagi faoliyatidan keyin O'zbekiston chempionatining saviyasi ancha o'sgani va o'yinlar qiyinlashganini e'tirof etdi.