Nikoh shartnomasi va to'ylar nazorati 💍

O‘zbekiston Xalq demokratik partiyasidan bo‘lgan senator Maqsuda Vorisova oilaviy munosabatlarni tartibga solish va to‘y-hashamlardagi ortiqcha xarajatlarning oldini olishga qaratilgan qator muhim takliflarni ilgari surdi. Unga ko‘ra, mamlakatimizda majburiy nikoh shartnomasi institutini ishlab chiqish va joriy etish vaqti keldi.

Senatorning fikricha, har bir yangi oila qurayotgan juftlik o‘rtasida tuziladigan bunday shartnomada er va xotinning barcha huquqlari hamda burchlari qat'iy ravishda o‘z aksini topishi lozim. Bu kelgusida yuzaga kelishi mumkin bo‘lgan tushunmovchiliklarning oldini olishga xizmat qiladi.

Shu bilan birga, Maqsuda Vorisova to‘y marosimlarini o‘tkazish tartibini ham qat'iylashtirishni taklif qildi. Uning tashabbusiga ko‘ra, to‘ylar mahalla faollari va huquqni muhofaza qilish organlari xodimlari nazorati ostida o‘tkazilishi maqsadga muvofiq bo‘ladi.

Senatorning ishonch bildirishicha, agar ushbu barcha takliflar va choralar amalda tatbiq etilsa, jamiyatda ijobiy o‘zgarishlar yuz beradi. Xususan, bu xalqimizni to‘ylarda ortiqcha va keraksiz xarajatlarga yo‘l qo‘yishdan voz kechishiga sabab bo‘ladi.