🎾 Chexiya Devis Kubokida AQShni yana mag'lub etdi!

Prha shahridagi O2 Arena kortlarida tennis bo'yicha Devis Kubokining saralash ikkinchi bosqichidan o'rin olgan hal qiluvchi bahslar nihoyasiga yetdi. Unda Chexiya terma jamoasi Amerika Qo'shma Shtatlari jamoasini umumiy 3:2 hisobida mag'lubiyatga uchratib, navbatdagi bosqichga yo'llanma oldi.

Musobaqaning so'nggi kun oldidan AQSh terma jamoasi 2:1 hisobida oldinda borayotgan edi. Biroq chexiyalik tennischilar o'tgan yildagidek yana iroda ko'rsatib, umumiy hisobni o'z foydalariga hal qilishdi. Dastlab Jakub Mensik amerikalik Ben Sheltonni 5:7, 6:4, 6:3 hisobida taslim etib, jamoalar o'rtasidagi umumiy hisobni tenglashtirdi.

Shundan so'ng kortga chiqqan Jiri Lehecka hal qiluvchi yakkalik bahsida Devis Kubokida debyut qilgan Lerner Tien bilan to'qnash keldi. Bosimga bardosh bergan Lehecka raqibini 6:3, 7:5 hisobida yengib, Chexiyaning umumiy g'alabasini ta'minladi. Uchrashuvning so'nggi daqiqalarida Lehecka ajoyib forehand zarbasi bilan g'alabani rasmiylashtirib, quvonchdan kortga yiqildi.

AQSh terma jamoasi sardori Bob Brayan shogirdlarining o'yinidan faxrlanishini bildirdi. U Ben Shelton va boshqa o'yinchilar vatan uchun kurashda yoshlarga namuna bo'lganini ta'kidlab, mag'lubiyatdan afsusda emasligini aytdi.

Ushbu g'alaba evaziga Chexiya terma jamoasi 24-29-noyabr kunlari Boloniya shahridagi Super Tennis Arenada bo'lib o'tadigan Devis Kubokining Final 8 bosqichida qatnashish huquqini qo'lga kiritdi.