Pedri: Tarixda faqat bitta Messi bo‘ladi ⚽️

"Barselona" yarim himoyachisi Pedri jamoaning sobiq hujumchisi va hozirda "Pari Sen-Жermen" sharafini himoya qilayotgan Lionel Messining faoliyati hamda rekordlari haqida o'z fikrlari bilan o'rtoqlashdi. Uning so'zlariga ko'ra, har bir futbolchi singari u ham Messidek buyuk natijalarga erishishni va unchalik ko'p "Oltin to'p" mukofotlarini yutib olishni istaydi. Biroq yosh yarim himoyachi buning uchun ulkan mehnat talab etilishini yaxshi tushunadi va tariximizda faqat bitta Messi bo'lishi mumkinligiga ishonadi. Uning fikricha, argentinalik yulduz erishgan marralarni takrorlashning aslo iloji yo'q.

Shuningdek, intervyu davomida Pedri Ispaniya chempionatining to'qqizinchi turi doirasida Madridning "Real" klubiga qarshi o'tadigan bo'lajak o'yin haqidagi taassurotlarini ham tilga oldi. Uning ta'kidlashicha, El-Klasiko juda ko'p muxlislar e'tibor bilan kuzatib boradigan qarama-qarshilik hisoblanadi. Futbolchining fikricha, bunday uchrashuvlardan barcha zavq olishi kerak, chunki futbolning asosiy maqsadi ham odamlarga quvonch ulashishdan iborat. Pedri bolaligida ota-onasi bilan birgalikda stadionga borib, "Barselona" ishqibozlari qurshovida o'yinlarni tomosha qilgani va bundan boshqa olamda bo'lganini esga oldi.

Eslatib o'tamiz, 35 yoshli argentinalik hujumchi 2004-2021 yillar oralig'ida "Barselona" safida to'p surgan. Shu davr mobaynida u Kataloniya klubi tarkibida jami 778 ta uchrashuvda maydonga tushib, raqiblar darvozasiga 672 ta gol kiritgan va jamoadoshlariga 303 ta golli uzatma amalga oshirgan. "Barselona" hamda "Real" jamoalari o'rtasidagi navbatdagi o'yin 16 oktyabr kuni bo'lib o'tishi belgilangan.