Nadalning mashg'ulotiga minglab muxlislar keldi 🎾

Fransiyaning markaziy qismidan kelgan Vanessa Peltye ismli muxlisa Rafael Nadalning mashg'ulotini o'z ko'zi bilan ko'rish maqsadida tongda turib, 500 kilometr yo'l bosib Parijga yetib keldi. U va boshqa minglab muxlislar ispan chempionining "Rolan Garros"dagi ehtimoliy oxirgi chiqishini kuzatish uchun asosiy kort tashqarisida uzun navbat hosil qilishdi. Muxlislar orasida ishni tashlab kelganlar ham bor edi.

O'tgan yil va joriy mavsumning ko'p qismida jarohatlar sababli maydonga tusha olmagan 37 yoshli Nadal ikki hafta oldin Italiya ochiq chempionatining uchinchi bosqichida mag'lubiyatga uchragandi. Bu holat uning jismoniy holati bo'yicha savollarni tug'dirgan bo'lsa-da, u hali turnirga tayyor yoki tayyor emasligini rasman ma'lum qilmadi. Shunga qaramay, muxlislar bu ularning afsonaviy tennischini ko'rish uchun so'nggi imkoniyati bo'lishi mumkinligini yaxshi bilishadi.

Mashg'ulot davomida Nadal avvaliga past sur'atda to'p almashdi, so'ngra amerikalik sparing-partnyori Sebastyan Korda bilan ikki set o'ynadi. Ispaniyalik tennischi muvaffaqiyatli zarba yo'llaganida, tribunadagilar "Rafa, Rafa" deya olqishlab, uning nomini baralla qichqirishdi. Shuningdek, muxlislar kirish eshigi oldidagi Nadal haykali va uning karton maketi yonida suratga tushish uchun ham navbatda turishdi.

"Rolan Garros" suvenirlar do'konida Nadal mahsulotlari uchun alohida bo'lim ajratilgan bo'lib, uning imzosi tushirilgan bosh kiyim 28 yevroga sotilmoqda. Muxlislar qimmatligiga qaramay, bu kelajakda yaxshi xotira bo'lishini aytishdi. Turnirning boshlanishi esa yakshanba kuniga belgilangan.