Rashfordni Barcelona kutmoqdami? ⚽️

Portugaliyalik yarim himoyachi Bernardo Silvaning «Real»ga o‘tishga yaqin turgani Markus Rashfordning «Barselona»dagi kelajagiga ijobiy ta'sir ko‘rsatishi mumkin. «Manchester Siti» bilan amaldagi shartnomasi iyun oyi oxirida yakuniga yetadigan futbolchi transfer bozorida erkin agent maqomiga ega bo‘ladi va uni Madrid klubi o‘z safiga qo‘shib olish arafasida turibdi.

Taniqli insayder Fabrisio Romanoning ma'lumotlariga ko‘ra, tomonlar 2028 yilning iyunigacha mo‘ljallangan bitim shartlarini yakunlashmoqda. Ayni paytda Portugaliya terma jamoasi safida 2026 yilgi Jahon chempionatida qatnashayotgan 31 yoshli futbolchi musobaqa vaqtida tibbiy ko‘rikdan o‘tishi ehtimoli bor. Bu transfer «Real»ning yangi bosh murabbiyi Joze Mourinyoning jamoaga qaytganidan keyingi ilk xaridi bo‘lishi kutilmoqda.

Avvalroq Bernardo Silva uchunasosiy da'vogarlardan biri «Barselona» hisoblanar edi. Biroq futbolchining «shaharliklar» bilan yangi shartnoma imzolashdan bosh tortib, faoliyatini Ispaniyada davom ettirishni tanlashi kataloniyaliklar uchun kutilmagan zarba bo‘ldi. U «Manchester Siti» safida o‘tkazgan yillari davomida oltita APL chempionligini qo‘lga kiritib, jami 19 ta sovringa ega chiqqandi.

«Real»ning bu transferi «Barselona»ning yozgi rejalari o‘zgarishiga sabab bo‘lishi va Markus Rashfordga qaratilgan e'tiborni kuchaytirishi mumkin. Kataloniya klubi iyun oyining o‘rtalariga qadar ingliz hujumchisini 26 million funt sterling evaziga to‘liq sotib olish huquqiga ega. Garchi jamoa allaqachon Entoni Gordon bilan kelishuvga erishgan bo‘lsa-da, Bernardo Silvaning boy berilishi Rashfordning transfer ehtimolini oshirishi nazariy jihatdan istisno etilmayapti.