AKFA Group KazBuild-2023 ko‘rgazmasida 🏢

Olmaotada 6-8 sentabr kunlari bo‘lib o‘tayotgan 29-Xalqaro qurilish ko‘rgazmasi KazBuild-2023 o‘z ishini davom ettirmoqda. Mazkur yirik sanoat anjumanida dunyoning 23 mamlakatidan 235 dan ortiq kompaniya o‘z mahsulotlari va xizmatlari bilan qatnashmoqda. O‘zbekiston sharafini ushbu nufuzli tadbirda mamlakatimizning yetakchi sanoat birlashmalaridan biri bo‘lgan AKFA Group xoldingi munosib himoya qilmoqda. Ko‘rgazma qatnashchilarga yangi ishbilarmonlik aloqalarini o‘rnatish, tajriba almashish hamda soha yangiliklari bilan tanishish uchun keng imkoniyatlar yaratadi.

O‘z stendida AKFA Group o‘z faoliyatining bir nechta asosiy yo‘nalishlari bo‘yicha eng sara ishlanmalarini namoyish etdi. Jumladan, tashrif buyuruvchilar AKFA Windows & Doors alyuminiy va PVX tizimlari, AKFA Comfort isitish jihozlari, shuningdek, AKFA Accessories va AKFA Build kabi yo‘nalishlar mahsulotlari bilan yaqindan tanishish imkoniyatiga ega bo‘lmoqdalar.

Xususan, xolding tomonidan Markaziy Osiyo va Qozog‘iston iqlim sharoitiga moslashtirilgan yangi energiya tejamkor derazalar taqdim etildi. Ushbu termoderazalar maxsus oyna paketlari yordamida yaratilgan bo‘lib, tashqi ta'sirsiz xona ichidagi issiqlikni mustaqil saqlab qolish xususiyatiga ega. Tashqi ko‘rinishidan odatiy derazalardan farq qilmaydigan bu mahsulotlar avtomatik tarzda ishlaydi va ham issiq, ham sovuq o‘tkazmaydigan qulay haroratni ta'minlaydi.

Shuningdek, ko‘rgazmada namoyish etilgan AKFA Comfort alyuminiy va bimetalli radiator modellari ham alohida e'tiborga loyiq. Ushbu isitish moslamalari ham markaziy, ham xususiy isitish tizimlarida yuqori energiya samaradorligini ta'minlab, uylarga issiqlik ulashishga mo‘ljallangan. Tadbir yakunlari sanoat mutaxassislari uchun muhim bosqich bo‘lishi kutilmoqda.