Angliya terma jamoasida o'zgarishlar 🏉

Angliya terma jamoasi bosh murabbiyi Stiv Bortvik yakshanba kuni Fransiyaning Nitsa shahrida Yaponiyaga qarshi o'tkaziladigan Ragbi bo'yicha Jahon chempionati D guruhi uchrashuvi oldidan asosiy tarkibda uchta o'zgarishga qo'l urdi. Jamoa oldingi turda Argentinani 27:10 hisobida mag'lub etgan edi. O'sha bahsda qizil kartochka olgan Tom Karri diskvalifikatsiya sababli ushbu uchrashuvni o'tkazib yuboradi.

Uning yo'qligida "Northampton Saints" klubi a'zosi Luis Ladlam asosiy tarkibga kiritilib, sakkizinchi raqamda maydonga tushadigan bo'ldi. Argentina bilan o'yin oxirida zaxiradan maydonga tushib, 11 ta to'pni to'xtatgan Ladlamning bu safar boshidan o'ynashi Ben Erlning qanot himoyachisi pozitsiyasiga o'tishiga sabab bo'ldi. Shuningdek, Billi Vunipola o'z diskvalifikatsiya muddatini tugatib, zaxiralar qatoridan joy oldi.

Hujum chizig'ida ham o'zgarishlar ro'y berib, Kayl Sinkler va Jo Marler asosiy tarkibga jalb etildi. Ellis Genj va Den Koul zaxiraga tushirildi, Koul esa hatto zaxiradagilar ro'yxatiga ham kiritilmadi. Jamoani bu safar ham sardor Kortni Louz boshlab boradi, chunki Ouen Farrelning to'rt o'yinlik diskvalifikatsiyasidan yana bitta o'yni qolgan.

Stiv Bortvik jamoaning Yaponiyaga qarshi o'yinga tayyorgarligi yaxshi o'tganini ta'kidladi. Yaponiya o'zining ilk turida Chilini 42:12 hisobida yengib, guruhda birinchi o'rinda bormoqda, Angliya esa ulardan bir ochko ortda qolgan holda ikkinchi o'rinni egallab turibdi.