🏎 Kimi Antonelli yetakchilik qilmoqda

2026-yilgi Formula 1 mavsumi "Mercedes" jamoasi ichidagi keskin kurashlar bilan diqqatni tortmoqda. Dastlab Jorj Rassel chempionlik uchun asosiy da'vogar sifatida ko'rilgan edi, biroq mavsum davomida yosh iqtidor egasi Kimi Antonelli barchani hayratda qoldirib, jamoada ustunlikni o'z qo'liga oldi. Melburndagi ilk poygadan keyin Rassel chempionatni yutishiga ishongandek ko'ringan edi, biroq Xitoydagi bosqichdan boshlab vaziyat keskin o'zgardi.

Antonelli Xitoyda g'alaba qozonib, ketma-ket yana to'rtorta poygada zafar quchdi. Hozirda uning hisobida sakkizta g'alaba mavjud bo'lib, u chempionat peshqadamligini saqlab qolgan holda ikkinchi o'rindagi Rasselni 81 ochkoga ortda qoldirmoqda. Eng e'tiborli jihatlardan biri, Antonelli Monzadagi bahsda motor jarimasi tufayli 19-o'rindan start olganiga qaramay, Rasselni ortda qoldirib g'alaba qozondi.

Sobiq Formula 1 poygachisi Jonni Xarbertning ta'kidlashicha, Rassel hamon o'zining jamoadoshini nima uchun yuta olmayotganini tushunmayapti. Rasselning so'zlariga ko'ra, mashina uning uslubiga unchalik mos kelmayapti. Xarbertning fikricha, Kimi juda barqarorlik ko'rsatayotgan bo'lsa, Jorjning natijalari o'zgaruvchan bo'lib qolmoqda. Ba'zida u tezroq harakatlanishi mumkin, ammo kerakli darajada barqaror emas.

Shuningdek, mavsum davomida Antonellining ayrim g'alabalari omadga bog'langani haqida gap-so'zlar ham ko'paydi. Masalan, Madridda o'tgan Ispaniya Gran-prisida virtual xavfsizlik mashinasi Lando Norrisning poygasiga ta'sir qilgani va Monzada Charlz Lekler tufayli qizil bayroq chiqqani Kimiga qo'l kelgandi. Biroq Xarbert chempion bo'ladigan poygachilarga ba'zan omad ham kerakligini, lekin bu Antonellining xizmatlarini kamaytirmasligini qayd etdi.