⚽️ Deportivo va Mallorca bahsi oldidan

Seshanba kuni «Riazor» stadionida Ispaniya Qirol Kubogining 1/16 final bosqichi doirasida «Deportivo La Korunya» va «Mallorka» jamoalari o'zaro to'qnash kelishadi. Ushbu uchrashuv ikkinchi divizionda muvaffaqiyatli harakat qilayotgan jamoa uchun joriy mavsumdagi ilk oliy liga sinovi bo'ladi.

O'tgan mavsumda mamlakat kubogining kumush medallarini qo'lga kiritgan «Mallorka» mazkur bahsda favorit maqomida maydonga tushadi. Xagoba Arrasate boshchiligidagi jamoa barcha musobaqalardagi so'nggi to'rtta o'yinda yengilmadi va oxirgi turda «Elche» ustidan 3:1 hisobida g'alaba qozondi. Oroliklar avvalgi bosqichda boshqa bir quyi liga vakili «Numansiya»ni 3:2 hisobida yenggan bo'lsa-da, uchta golli ustunlikni deyarli boy berib qo'yayozgandi. Klub oxirgi marta 2002-2003 yilgi mavsumda Samuel Eto'o ham gol urgan finalda zafar quchib, bosh sovrinni qo'lga kiritgan edi.

Mezbonlar esa ayni damda ikkinchi divizionda ikkinchi o'rinni egallab turibdi. Garchi ular ilgari barcha musobaqalarda yettita o'yindan iborat g'alabali seriya qayd etgan bo'lsa-da, so'nggi ikki uchrashuvda imkoniyatni boy berdi. 2001-2002 yilgi mavsum finalida «Real Madrid»ni mag'lub etib kubokni yutgan «Deportivo» ushbu bosqichga uchinchi divizion vakili «Sabadel» ustidan 2:0 hisobidagi g'alaba evaziga yetib keldi. Jamoalar oxirgi marta 2009 yilda o'ynagan bo'lib, o'shanda «Mallorka» 3:0 hisobida zafar quchgan edi. Tarixiy nuqtai nazardan esa «Deportivo» ustunroq bo'lib, o'tkazilgan 28 ta o'yinning 11 tasida g'alaba qozongan va bor yo'g'i 7 marta yutqazgan.

Tarkiblarga kelsak, «Mallorka»da Manuel Morlanes adduktor jarohati sabab maydonga tusha olmaydi. Shuningdek, Omar Maskarell Afrika Millatlar Kubogida qatnashish uchun jamoani tark etgan. Hujumchi Vedat Muriqi esa joriy mavsumda o'tkazgan 15 ta o'yinning 9 tasida gol urishga muvaffaq bo'ldi. Mezbonlar safida esa Serxio Eskudero mushaklaridagi jarohat tufayli seshanba kungi bahsni o'tkazib yuboradi. Bosh murabbiy Antonio Idalgo hujum chizig'ida Zakariya Eddaxchuri hamda Yeremi Ernandesga tayanadi, chunki bu ikki futbolchi joriy mavsumda jami 23 ta samarali harakatni amalga oshirdi.