✈️ British Airways reyslari bekor qilindi

Britaniyaning mashhur British Airways aviakompaniyasi o'zining asosiy bazasi bo'lgan Londonning Xitrou aeroportida ketma-ket uchinchi kundirki reyslarni ommaviy ravishda bekor qilmoqda. Oxirgi ma'lumotlarga ko'ra, o'ttizdan ortiq qisqa masofali parvozlar, jumladan Venaga qatnovchi ikkita reys hamda Malaga, Nitsa va Rim kabi mashhur dam olish maskanlariga uchadigan samolyotlar qatnovi to'xtatilgan.

London Siti aeroportida ham Malaga, Nitsa va Rotterdam yo'nalishlaridagi parvozlar bekor qilingani ma'lum bo'ldi. Shuningdek, Getvik aeroportidan Marokash, Turin, hamda Tampa va Las-Vegasga qaratilgan uzoq masofali reyslar ham bu holatdan chetda qolmadi. Getvikdan Tenerifega uchishi kerak bo'lgan samolyot parvozi esa o'n soatga kechiktirilgan.

Juma va shanba kunlari kompaniya Xitroudan amalga oshirilishi kerak bo'lgan 160 tadan ortiq reysni bekor qilgan edi. Bunga yomon ob-havo sharoiti va havo harakatini boshqarish cheklovlari sabab qilib ko'rsatilgan. Aviatsiya xizmatlarini kuzatib boruvchi Flightradar24 ma'lumotlariga tayanilsa, yakshanba kuni mazkur aeroportda boshqa birorta aviakompaniya o'z reyslarini bekor qilmagan.

Parvozlarning bekor qilinishi yo'lga chiqmoqchi bo'lgan fuqarolarning haqli noroziligiga sabab bo'lmoqda. Masalan, to'y marosimiga shoshilayotgan yo'lovchilardan biri ijtimoiy tarmoqda o'z e'tirozini bildirib, kompaniya so'nggi daqiqada reysni bekor qilgani va odamlar javob topish uchun soatlab vaqt sarflayotganini tanqid qilgan. Aviakompaniya rasmiy sahifasi esa yo'lovchidan ma'lumotlarni shaxsiy xabar orqali yuborishni so'ragan.

Biroq ushbu vaziyatdan foydalanib qolishni istagan firibgarlar ham paydo bo'ldi. O'zini kompaniya vakili deb tanishtirgan soxta sahifalar yo'lovchilarga aloqaga chiqib, tovon puli olish bahona WhatsApp orqali maxsus ilovalarni yuklab olishni so'ramoqda va natijada fuqarolarning mablag'larini o'zlashtirib olmoqda.