Prezident Andijonda yangi maktabda bo'ldi 🏫

O'zbekiston Respublikasi Prezidenti Shavkat Mirziyoyev Andijon shahriga amalga oshirgan safari doirasida "Yangi Avlod" xususiy maktabiga tashrif buyurdi. Joriy yilda o'z faoliyatini boshlagan ushbu umumta'lim muassasasi bir ming o'quvchiga mo'ljallangan bo'lib, zamonaviy sharoitlarga ega.

Ikki qavatli ikkita o'quv binosida jami ellik beshta sinf xonasi, uchta laboratoriya va maxsus fan xonalari mavjud bo'lib, ularning barchasi zarur o'quv jihozlari bilan ta'minlangan. Mazkur maktab chet tillarini chuqurlashtirib o'qitishga ixtisoslashgan bo'lib, bu yerda ingliz, xitoy va arab tillari o'rgatiladi.

Shuningdek, maktabda ingliz tilida aniq fanlarni o'qitishga mo'ljallangan interaktiv sinf, mantiqiy arifmetika, axborot texnologiyalari va robototexnika to'garaklari faoliyat yuritmoqda. O'quvchilarning bo'sh vaqtini mazmunli o'tkazishi va jismoniy tarbiya bilan shug'ullanishi uchun oshxona, yopiq hamda ochiq sport maydonchalari, gimnastika va xoreografiya xonalari ham tashkil etilgan.

Davlat rahbari maktab o'quvchilari bilan suhbat chog'ida bilim olishning muhimligini alohida ta'kidladi. U yoshlarga murojaat qilib, har doim izlanishda bo'lish, kelajakda o'z o'rnini topish uchun bugun puxta o'qish zarurligini qayd etdi. "Bizning yagona to'g'ri yo'limiz – bu ilm-fan yo'lidir", dedi Prezident.

Tashrif chog'ida kelgusida ushbu hududda maktabgacha ta'lim muassasasi va universitetni o'z ichiga olgan klaster barpo etish loyihasi ham taqdim etildi. Unga ko'ra, maktab yaqinida 150 o'rinli bolalar bog'chasi va 500 o'rinli axborot texnologiyalari universitetini qurish rejalashtirilgan. Shu tariqa bolalar bog'chadan boshlab IT va tillarni chuqur o'zlashtirishi uchun sharoit yaratiladi. Shundan so'ng davlat rahbari jurnalistlarning savollariga javob berib, Andijon viloyatiga safarini yakunladi va Toshkentga jo'nab ketdi.