Qo'yluqda bloger Arsen Avanesyan kaltaklanishiga oz qoldi ⚠️

Yashnobod tumanidagi muammolarni jamoatchilikka yetkazib kelayotgan tanish bloger Arsen Avanesyan navbatdagi safar ham dolzarb masala bo'yicha reyd o'tkazishga urindi. Bu safar u Qo'yluq bozori yaqinida istiqomat qiluvchi fuqarolarning shikoyatlarini o'rganishni maqsad qilgan edi. Mazkur hududdagi uylar atrofida har kuni soatlab ish beruvchilarni kutib turadigan yollanma ishchilar to'planib qolishi odat tusiga kirgan.

Mahalliy aholi vakillarining ta'kidlashicha, oxirgi paytlarda mahallada o'g'irlik jinoyatlari keskin ko'payib ketgan. Shuningdek, ota-onalar farzandlarini ko'chaga yolg'iz chiqarishga qo'rqib qolishganini aytishmoqda. Aholining noroziligiga sabab bo'layotgan yana bir omil — yollanma ishchilarning o'zini o'ta tajovuzkor va nomaqbul tutishi, sanitariya qoidalarini qo'pol ravishda buzib, chiqindilarni belgilanmagan joylarga tashlashi hamda ko'chalarning o'zida hojat chiqarishidir.

Muammolarni navbatdagi bor videoga muhrlashga kirishgan Arsen Avanesyan metro estakadasi ostida turgan ishchilarning agressiv qarshiligiga duch keldi. Qonunchilikda belgilangan taqiqqa qaramay, ba'zi shaxslar yuzlarini tanib bo'lmaydigan darajada berkitib olgan holda blogerga tashlanishdi. Ular uyatli so'zlar bilan baqirib, tasvirga olishni qo'pol ravishda to'xtatishni talab qilishdi.

Ziddiyat avj olgan vaqtda voqea joyiga patrul-post xizmati xodimlari yetib kelib, mojaroni bostirishga harakat qilishdi. Biroq tartib qo'riqchilari aralashuviga qaramay, ba'zi ishchilar blogerga tashlanish urinishlarini to'xtatishmadi. Hozirgi vaqtda ushbu hodisa yuzasidan rasmiy idoralar tomonidan hech qanday rasmiy axborot berilmagani ma'lum qilinmoqda.