Rafinya maoshini ikki barobar oshirishni talab qilmoqda 🇧🇷

Kataloniyaning “Barselona” klubi vingeri Rafinya hozirgi kunda jamoa bilan yangi mehnat shartnomasini tuzish yuzasidan muzokaralar olib bormoqda. Mashhur turkiyalik insayder Ekrem Konur o‘zining X ijtimoiy tarmog‘idagi sahifasida ushbu jarayon tafsilotlari haqida xabar berdi.

Manbaning ma’lum qilishicha, braziliyalik hujumkor futbolchi “ko‘k-anorranglilar” rahbariyatidan o‘z maoshini ikki baravarga oshirishni qat’iy talab qilmoqda. Agar kataloniyaliklar futbolchining bu shartlarini bajarishga rozi bo‘lmasa, Rafinyaning faoliyatini davom ettirish uchun boshqa qulay variantlari ham mavjudligi aytilmoqda.

Qayd etilishicha, hozirgi kunda braziliyalik futbolchining xizmatlariga Yevropaning nufuzli jamoalari va Osiyo klubi qiziqish bildirmoqda. Jumladan, “Arsenal”, “Manchester Yunayted”, “Liverpul” hamda “Al-Hilol” klublari Rafinyani o‘z safiga qo‘shib olishga tayyor ekanini bildirgan. Ushbu jamoalar futbolchiga hozirda “Barselona”da olayotgan maoshidan ancha yuqoriroq moliyaviy shartlar taklif qilishga tayyorligi ma’lum qilindi.

Ma’lumot uchun, Braziliya terma jamoasi a’zosining kataloniyalik klub bilan imzolagan amaldagi shartnomasi 2028-yilning yoziga qadar mo‘ljallangan. Rafinya joriy mavsum davomida Ispaniya chempionati va Chempionlar Ligasida juda samarali o‘yin ko‘rsatmoqda. U hozirgacha o‘tkazilgan uchrashuvlarda 11 ta gol urishga muvaffaq bo‘ldi va jamoadoshlariga 3 ta golli uzatma aytib berdi.